________________
३०६
सिरिभुयणसुंदरीकहा ॥ निज्जामएण भणियं 'वच्चह तुरियं किमेत्थ भणियव्वं ? । पावेमि परं तीरं जइ अणुयत्तंति विहि-पवणा' ॥३३४७॥ तो ते सह कुमरेणं गया समीवंमि रायधूयाए । कुमरेणं सा भणिया 'सुंदरि ! गच्छम्ह पोएण' ॥३३४८।। 'तुह वयणं चिय पिययम ! मज्झ पमाणं'ति उठ्ठिया भणिउं । चंदसिरी, तो पभणइ कुमरं निज्जामओ एयं ॥३३४९।। ‘एएणं जह नयणे नासा-सवणाई ज्झंपह इमेण । पच्छा दुवे वि तुब्भे नीसंका जाह जलहिंमि' ।।३३५०॥ तव्वयणमणुढेउं बंधुजीवाए कयपणामाई । तीए अहिणंदियाइं दोन्नि वि पोयं पहुत्ताई ॥३३५१।। तो नियइ सत्थवाहो तं मिहुणं जाणवत्तपडिलग्गं । महणविणिग्गयमंदर-तडसंगयससहरसिरिं व्व ॥३३५२।। पीणुत्तुंगपओहरवित्थारपणोल्लिओयहितरंगा । कंचणकुंभजुएणं तरइ व्व सकोउयं बाला ।।३३५३।। तव्वेलुवे(व्वे)ल्लिरतुंगलहरिसिहरग्गसंठिओ कुमरो । ससिरि व्व हरी रेहइ वासुइसयणे समुइंमि ॥३३५४।। 'पेच्छह अउव्वरूवं पुरिसं नारिं च विजियतैलोक्कं । कह जलहिँमि पवेसो इमाण ? कहमेत्थमच्छरियं ? ||३३५५।। किं उयहिकुमारो एस होज्ज नियपणइणीए परियरिओ ? । नारायणो व्व किं वा लच्छिजुओ वसइ जलहिँमि ? ॥३३५६॥ किं वा गयणपरिस्समसंतावायासिओ समुइंमि । विज्जाहरो सदइओ जलकेलीसोक्खमणुहवइ?' ||३३५७।।
Jain Education International
For Private & Personal Use Only
www.jainelibrary.org
