________________
३०१
सिरिभुयणसुंदरीकहा ॥
अइनिम(म्म)ला वि मलिणीहवंति पुरिसा उवाहिदोसेण । फालिहमणि व्व तम्हा हेउ च्चिय सकलुसोवाही' ||३२९२।। इय सोऊण असोओ वयणं कुमरस्स जायबहुलज्जो । अनिरिक्खंतो समुहं अहोमुहो चिंतई एवं ॥३२९३॥ 'पच्चक्खं च्चिय दीसइ अंतरमहमुत्तिमाण पुरिसाण । जह अहयं पि य अहमो जह एसो उत्तमो कुमरो ॥३२९४।। जं जं परिभाविज्जइ तं तं चिय अहममेव मह कम्मं । अहमाणुट्ठाणेणं अहमत्तं होइ पुरिसस्स ॥३२९५।। एयस्स पुणो सव्वं अच्चुत्तममेव सुहसमायरणं । एएण उत्तमो च्चिय कुमरो पडिहाइ मह हियए ।।३२९६।। उत्तमकुल-जाई वि य अहमायरणेण होति जं अहमा । उत्तमकम्मायरणा इयरे वि य उत्तमा होति ।।३२९७।। परमरिऊ अवयारी रणंगणे मारण(णु)ज्जुओ बलवं । विणिवाइओ वि इमिणा अहमेवं रक्खिओ तह वि ||३२९८।। कुंभुब्भवचुलुयपमाणजलहिणो पयडमेव गहिरत्तं । सुयणाण पुणो हिययं अलद्धथाहाण अपमाणं ॥३२९९।। ता सव्वहा निएणं चरिएणं लज्जिओ न पारेमि । दिढि इमस्स धरिउं दूरे पच्चुत्तरपयाणं ।।३३००।। अहिमाणमेव जीयं तं पि कुमारेण अवहडं मज्झ । ता निज्जीवो म्हि सवो सवो वि कह उत्तरं देइ ?' ॥३३०१।। इय चिंतिउं असोओ अदिन्नपडिउत्तरो य सहस त्ति । जाओ अदिस्सरूवो सुविणयपुरिसो व्व खणमेत्तो ॥३३०२।।
Jain Education International
For Private & Personal Use Only
www.jainelibrary.org
