________________
२९५
सिरिभुयणसुंदरीकहा ॥ इहरा वि हु मरियव्वं केत्तियदियहेहिं ता वरं एण्हि । अमलियमाणस्स रणे अणेण सह मज्झ तं होउ' ॥३२२६।। इय जा चिंतइ खयरो ता भणिओ वीरसेणकुमरेण । किं चिंतसि? मा बीहसु न हणेमि असोय ! वच्चेसु ।।३२२७॥ मुक्काउहाण लज्जावसाण भीरूण मुच्छियाणं च । पहरइ न मज्झ हत्थो समरे पहरंतनारीण ||३२२८।। ता जइ वि मज्झ तुमए अवयरियं पिययमावहारेण । मुक्को सि तह वि वच्चसु न होसि निक्कारिमो सुहडो' ।।३२२९।। ईसीसि विहसिऊण भणइ असोओ ‘कुमार ! एवमिणं । पेच्छामि तुह वि सत्ती तुहोचियं तयणु काहिस्सं ॥३२३०।। विज्जाहरो म्हि बहुविहविज्जासामत्थ-सत्तिसंजुत्तो । जइ तुज्झ वि असमत्थो ता सव्वं निप्फलं मज्झ ।।३२३१।। तुह कमलकेउविणिवायणेण दप्पो सुदूरमारूढो ।। निहए तुमंमि संपइ निरासओ सो कहिं जाही? ।।३२३२।। अज्जेसा चंदसिरी कित्ति व्व जए पयट्टउ रणमि । मह तुज्झ वाऽणुबद्धा आजम्मं किन्नरुग्गीया ॥३२३३।। जेण तुमं भूगोयर ! कयत्थिओ पवणकेउणा तइया । सो किं ते वीसरिओ एण्हि खयराण सामत्थो ? ।।३२३४।। अमुणियविक्कमसारो सबुद्धिपरियप्पियप्पगव्वो य । कह भणसि मज्झ समुहं न होसि निकारिमो सुहडो? |३२३५।। पसरंति जे वि संखलगज्जिरवा एत्थ जुवइपासंमि । जइ निव्वहंति ते च्चिय रणमि ता किं न पज्जत्तं? ||३२३६।।
Jain Education International
For Private & Personal Use Only
www.jainelibrary.org
