________________
.
२१
सिरिभुयणसुंदरीकहा ॥
तो भणियं देवेणं कस्स न सगुणेसु आयरो होइ । ता कुणसु मज्झ वयणं अलंघणीया जओ देवा ।।२१४।। पुव्वभवुप्पन्नो च्चिय पणओ मणुयाण कुणइ संबंधं । अहवा सुहकम्मुदओ तइयं पुण कारणं नत्थि ॥२१५।। जइ वि तुह गुणगणावज्जियव्व नरनाह ! सेवया अम्हे । उवइससु तहवि नरवर ! जं विसमं किंपि कायव्वं ॥२१६।। इय सोउं सुरवयणं 'हाह'त्ति करेहिं पिहियकन्नेण । हरिविकुमेण भणियं किमणुचियं देव ! आएसं ॥२१७।। देवा तुब्भे पूयारिहा य अम्हेहिं तुम्ह आएसो । कायव्वो संपज्जइ सव्वमह तुह पसाएणं ।।२१८।। देवो भणइ अमोहं देवाणं दंसणं इय पवाओ । मा होउ असच्चो नरवरिंद ! तेणग्गहो मज्झ ॥२१९॥ हरिविकुमेण भणियं एवंविहदेवयापणामेण । संपन्नधम्मचिंतामणिस्स तुह दंसणममोहं ।।२२०॥ देवो भणइ अजाणिय-पत्थणरूवस्स पत्थणा निंदा । अम्हं तब्भंगे पुण अइगरुओ होइ मणखेओ ॥२२१॥ ता अकयवियारेणं मह वयणं सव्वहा वि कायव्वं । जइ अन्नहा वि कत्थसि ता तुह तित्थयरपयआणा ।।२२२।। उसहस्स पहावेणं वज्जो व्व कुमार ! अक्खयसरीरो । होहित्ति सत्तवाराओ फंसिओ अणंततेएणं ।।२२३।। जल-जलण-महाउह-दुद्रुसत्त-संगाम-वाहि-उग्घाया । सुर-असुर-मणुय-विज्जाहराओ तुह नत्थि भयसंका ।।२२४।।
Jain Education International
For Private & Personal Use Only
www.jainelibrary.org
