________________
सिरिभुयणसुंदरीकहा ॥
उइयससि-सूरलक्खं अन्नाणंधाण जायइ जयं पि । पयडपयत्थं पि सया तमं व दूरं निरालोयं ।।२८३०॥ लद्धेसु वि धम्मदिवायरेसु पयडियविसेसतत्तेसु । कोसियपक्खि व्व जिओ उज्जोओ जस्स तिमिरं व्व ।।२८३१।। जं किंपि एत्थ दुक्खं सारीरं माणसं च संभवइ । नर-तिरिय-नारएसुं तं जीवो लहइ अन्नाणी ॥२८३२॥ अन्नाणं मिच्छत्तं पावमधम्मो नियाणमेगट्ठा । एएण होइ जीवो दुही, सुही होइ नाणेण ।।२८३३।। अन्नाणमोहमूढो जीवो सव्वं पि मुणइ विवरीयं । धम्मे वि अधम्मत्तं देवे वि अदेवपडिवत्ती ॥२८३४।। पावाणुट्ठाणं पि हु धम्माणुट्ठाणमेव मन्नेइ । पेयमपेयं च तहा भक्खमभक्खं च जाणेइ ।।२८३५।। इय विविहभवब्भासियदुरंतअन्नाणमोहिओ जीवो । कम्माणुहावओ सो निवडइ पासंडिधम्मेसु ।।२८३६।। अन्नाणमोहियच्छा कुधम्मसत्थोवएसमूढमणा । चइऊ ण मोक्खमग्गं पडंति संसारमग्गंमि ॥२८३७।। वेया परमो देवो वेया परमागमो य सिद्धंतो । वेया चेव पमाणं इह-परलोएसु कज्जेसु ।।२८३८।। वेयाण फलं जन्नो जन्नाण फलं वयंति सग्गो त्ति । अज-तुरयमेहपमुहा जन्ना विनिवेइया वेए ।।२८३९।। अइअन्नाणविमूढो अहिलसमाणो मणमि सग्गसुहं । पसुमारणपावेणं निवडइ घोरंधनरएसु ।।२८४०।। टि. १. "०सत्थोवएसमूढाण" ला. ।।
Jain Education International
For Private & Personal Use Only
www.jainelibrary.org
