________________
२५६
सिरिभुयणसुंदरीकहा ॥ सोऊण तस्स वयणं संवेगोवसमसंगयं कुमरो । भणइ 'धन्नो निसायर ! तुमं ति जस्सेरिसा बुद्धी' ॥२७९७।। इय जाव ते परोप्परमालावं संगयं कुणंति इमं । ता पेच्छंति सविम्हयचारणमुणिजुयलयं गयणे ॥२७९८॥ थुवं(व्वं)तं नाणाविहविज्जाहर-असुर-सुरसमूहेहिं । गयणाओ ओयरंतं ससि-सूरजुयं व दिप्पंतं ॥२७९९।। नियतेयतिरोहियतरणितरुणकिरि(र)णोहपूरियदियंतं । परिवियडभवमहाडविदवग्गिजालाकरालं च ॥२८००।। तं निसयर-कुमराणं पेच्छंताणं पुरस्स बाहिमि । आणंदुज्जाणवणे ओयरियं खयर-सुरमहियं ।।२८०१।। तो भणइ वीरसेणो ‘एहि महासत्त ! वंदिमो एयं । मुणिजुयलं कयबहुभवपावमहापंकसलिलं व ॥२८०२।। एयाण दंसणेणं विहडइ मोहं(हो) पणासए पावं । होइ विवेउज्जोओ विसेसगुणपयरिसनिमित्तं' ।।२८०३।। तो भणइ रक्खसिंदो 'जइ एवं ता किमज्ज वि विलंबो ? ।' इय भणिउं ते तिन्नि वि साहुसमीवं गया तुरियं ॥२८०४।। कुमरेण पेसिओ सो पुरिसो पुर-जणवयस्स नरवइणो । आहवणत्थं तुरिओ सयं च पत्तो मुणिसमीवं ।।२८०५।। जा जाइ तत्थ पुरओ ता तुरियं नियइ सयलदेवेहिं । तण-सकराइ सव्वं अवणीयं तप्पएसाओ ।।२८०६।। गंधोदयवरिसेणं अवणीओ तत्थ धरणिरयपसरो । तव्वेलुकंटियसुरहिकुसुमपयरो वि विक्खिरिओ ॥२८०७।।
Jain Education International
For Private & Personal Use Only
www.jainelibrary.org
