________________
सिरिभुयणसुंदरीकहा ॥
पेच्छइ दुद्धरिसपहापहावविहडंतरक्खसतमोहं ।। निसियरनाहो पुरओ कुमरं पच्चूससूरं व्व ।।२७४२।। तो भणइ रक्खसो सो ‘कोऽसि तुमं ? केण वाऽवि कज्जेण । घोरपिसायनिरंतरपुरं पविट्ठोऽसि रयणीए ? ॥२७४३।। ता पलसु, जाहि तुरियं, जाव न भक्खिज्जसे पिसाएहिं । अप्पुव्वोऽसि सरूवं न जाणसे अम्ह नयरस्स' १२७४४।। तो भणइ रायपुत्तो तस्सास्स(स)यजाणणत्थि(त्थ)मिय वयणं । 'सच्चमउव्वो एण्हि अन्नायपुरवइयरो पत्तो ॥२७४५।। तो कहसु नियसरूवं नयरसरूवं च' पभणिए एवं । भणइ निसायरराया वयणमिणं जायदररोसो ।।२७४६।। 'चइऊण निययकालं अइदुलहं रयणिपुरपरिब्भणं । निप्फलपयासमेत्तं को तुह पडिउत्तरं देउ' ? ॥२७४७।। तो भणइ वीरसेणो ‘जइ एवं कत्थ जामि रयणीए ? । अन्नत्थ गओ नियमा उवद्दविस्सं पिसाएहिं ।।२७४८।। जह मं दटुं करुणा तुह जाया रक्खसिंद ! तह नन्ने । अणुकंपिस्संति ममं निसायरा निग्घिणसहावा' ।।२७४९।। पुण भणइ पिसायवई ‘ता अच्छसु पहिय ! जा अहं एयं । नरवइदिन्नं पुरिसं सपरियणो खामि हंतूण ।।२७५०।। तो भणइ पुणो कुमरो ‘किमणेणं भक्खिएण तुह होही ? ।' भणइ निसायरराया ‘तित्ती' कुमरो तओ भणइ ॥२७५१।। 'किं सव्वकालिया तुह होही तित्ती इमस्स मंसेण ? । तक्केमि तेण इह ते महग्गहो एयअसणंमि' ॥२७५२।।
Jain Education International
For Private & Personal Use Only
www.jainelibrary.org
