________________
२४९
सिरिभुयणसुंदरीकहा ॥
पत्तो अणेयरक्खससहस्सपहरुद्धनिग्गम-पवेसं । पेयाहिवइपुरं पिव पुरं कुमारो महाघोरं ।।२७२०॥ पविसइ सहावदुद्धरिसतेयपुंज्जो(जो) व्व रक्खसभडेहिं । जोइज्जंतो सभयं पुरं कुमारो सुवीसत्थो ।।२७२१।। विप्फुरियफाररक्खसफेक्कारफुरंतपडिरवरउदं । पेच्छइ पिसायसेन्नं रत्थामुह-चच्चर-तिएसु ।।२७२२।। नीसेसनयरगुणसंगयं पि अणुहरइ जं सुरपुरस्स । तं तेहिं समक्वंतं संजायं पिउवणसरिच्छं ।।२७२३।। अस्सच्चरवविगंधे(?) वस-मंसाहारभीसणायारे । सबिंदियअमणोन्ने कढिणट्ठी रक्खसे नियइ ।।२७२४।। भीसणपसारियमुहे ललंतजीहाकरालदुप्पेच्छे । कत्तियकवालहत्थे इओ तओ धावमाणा(णे)य ॥२७२५।। पेच्छइ पिसायमेगं कुओ वि लद्धामिसं पिसाएहिं । परिवेढियं रुयंतं अक्खिवणभया पलंतं च ॥२७२६।। उव्वेल्लइ कोवि दुहं परिउंचियरक्खसीमुहा समुहं । अइपविरलदसणंतरपविट्ठदसणो पिसायभडो ॥२७२७।। आलिंगइ अवरोप्परतणुपीडणकडयडंतपासुलियं । कत्थ वि रक्खसमिहुणं उयरंतरझुल्लिरथणग्गं ॥२७२८।। रुहिरासवभरियकरालघोरसंकंतनियमुहभएण । का वि निसायरनारी अवरुंडइ पिययमं भीया ।।२७२९।। इय नाणाविहरक्खसजणवइयरसंकुलं महानयरं । पेच्छंतो संपत्तो एगं पुरचच्चरं कुमरो ॥२७३०॥
Jain Education International
For Private & Personal Use Only
www.jainelibrary.org
