________________
२००
सिरिभुयणसुंदरीकहा ॥ एत्थंतरम्मि सोउं चंदसिरी वीरसेणवयणमिणं । पच्छायइ रोमंचं वरिल्लवत्थेण अंगम्मि ॥२१७९।। जोयइ तिरिच्छचलियच्छियतारयं विसमवलियभूभंगं । कुमरच्छिनिवायभया संकुइयं कहवि चंदसिरी ॥२१८०॥ एथा(त्था)वसरे जणणीए पेसिया तत्थ निययपडिहारी । नमिऊण भणइ कुमरिं 'देवी वारहइ(वाहरइ?) संचलह' ।।२१८१।। पियविप्पओगजणणं तव्वयणं वज्जवडणदुव्विसहं । सा रायसुया सोउं परियप्पइ किंपि हिययम्मि ॥२१८२।। अप्पत्थावम्मि कओ आएसो वि हु गुरूण दुल्लंघो । उव्वेवयरो जायइ पियविरहविसेसदुक्खेण ॥२१८३।। भूसन्नाए निउत्ता कुमरीए तओ विलासलच्छी वि । पुच्छइ ‘कुमार ! देविं अणुमन्नसु जणणिपासम्मि' ॥२१८४।। ‘एवं करेह' भणिए कुमरेण तओ सरीरमेत्तेण । झणझणिरनेउररवा सहीए जंती इमं भणिया ॥२१८५।। 'तेण तुह देवि ! अप्पा समप्पिओ जम्मपभिइ चउरेण । तुमए उण तं न कयं तस्स मणो जेण पत्तियइ' ॥२१८६।। तो भणइ रायधूया जइ सच्चं सो वियक्खणो चउरो । ता मज्झ मणं मुणिही अहवा कालंतरेणावि' ॥२१८७।। एसो य असोएण विज्जाबलच्छन्ननियसरूवेण । चंदसिरि-वीरसेणाण लक्खिओ नेहसंबंधो ।।२१८८।। तो ताण तेण दोहिं वि परोप्परं परमनेहनिबिडाण । विहडावणत्थमेवं वियप्पियं निययहिययम्मि ।।२१८९।।
Jain Education International
For Private & Personal Use Only
www.jainelibrary.org
