________________
१९९
सिरिभुयणसुंदरीकहा ॥
तुज्झोवरिपरिवड्डिय-गरुयसिणेहाणुरायविवसाए । एयाए कुमार ! अहं विणिउत्ता उचियकज्जेसु ।।२१६८।। गरुयाणुरायरसियं हिययं कुलबालियाण लज्जाए । कयअप्पगब्भभावं खललोओ अन्नहा मुणइ' ।।२१६९।। घेत्तूण कणयतलियं विलासलच्छीए बीडयसणाहं । घणसारहरिणनाहीसुयंधसिरिखंडकच्चोलं ॥२१७०।। अइसुरहिकुसुमसंभवसहत्थघणगुच्छमालियं पुरओ । काऊण सव्वमेयं समप्पियं वीरसेणस्स ॥२१७१॥ तेण वि नरिंदधूया-बहुमाणगुणेण अप्पणा गहियं । जहजोग्गयाए सव्वं विणिउत्तं अप्पणच्चेय ।।२१७२।। तो भणइ वीरसेणो “विलाससिरि ! तुम्ह सामिणी एसा । किं किं कमलब्भंतरनिविट्ठदिट्ठी पलोएइ ?" ॥२१७३।। सा भणइ “कुमारी एत्थ वंच्छए रायहंससंबंधं । माणसकमलनिवासो किमस्स इट्ठो अणिट्ठो वा ? ||२१७४।। इय वासणाए एसा पुणो पुणो कमलगब्भमिक्खेइ ।' तो भणइ वीरसेणो “सच्चमिणं पभणियं तुमए ।।२१७५।। जइ सुद्धोभयपक्खो जइ विमलमई य गुणविभागन्नू । ता जम्मपभिइ एसो वस(सि)ही एत्थेवमणुलग्गो ॥२१७६।। मोत्तूण सिरि-सरस्सइनिवासमेयं समुज्जलगुणटुं । अहिणववियासमेसो किं वसही लिंबकुसुमम्मि ?" ॥२१७७।। पभणइ विलासलच्छी ‘एएणं चिय कुमार ! कज्जेणं । वररायहंसवासं अहिलसइ निरंतरं एसा' ।।२१७८।।
Jain Education International
For Private & Personal Use Only
www.jainelibrary.org
