________________
सिरिभुयणसुंदरीकहा ॥
१८१ सोऊण इमं कुमरो परिभावइ नियमणम्मि थिरचित्तो । कालंतरेण होही पुरओ मह कज्जसंसिद्धी ।।१९७०॥ सव्वबलाणं बलियं सउणबलं चेव एत्थ भुयणम्मि । एसो य वयणसउणो न अन्नहा मन्नणीओ मे ||१९७१।। तो होउ एवमेयं बालक्कीलाए ताव अच्छिस्सं । मह कुलकमागयाए चंपाए अहं दिणे कइवि" ।।१९७२ ।। चिंतंतो जा एवं अच्छइ तत्थेव हट्टमज्झम्मि । ता एगो सामंतो पविसइ संज्झाए रायगिहं ।।१९७३।। कोयंड-कुंत-फारक्क एक्क(चक्क?)पायिक्कलोयपरियरिओ । बंदीहिं य थुवंतो अइतुरियकरेणुयारूढो ।।१९७४॥ गच्छंतस्स य वीरो सीहकिसोरो व्व दूरकयफालो । आरुहइ करिणिपुष्टुिं उवविसइ य तस्स पासम्मि ॥१९७५।। 'को एस' ? त्ति ससंकं तप्परियणविहियकलयलरवेण । अच्छुद्धमणो वीरो मंभीसइ तंपि सामंतं ।।१९७६।। सामंतेणं भणियं 'को सि तुमं ? किंनिमित्तमिह चडिओ ? ।' वीरेणं सो भणिओ ‘किं काहिसि मज्झ तत्तीए ? ।' ||१९७७।। सामंतेणं भणियं 'उत्तरसु, न जामि तुज्झ वीसासं' । उत्तरइ वीरसेणो पुच्छम्मि करेणुयं धरइ ||१९७८।। न चलइ पयं पि करिणी जाव तओ ताव तस्स भिच्चेहिं । आढत्तो सो हंतुं वीरो सर-सत्ति-सल्लेहिं ।।१९७९।। तो ताण दक्खयाए सामंतभडाण वीरसेणेण । गहियाइं आउहाई मोडेऊणं पक्खि(खि)त्ताइं ।।१९८०।।
Jain Education International
For Private & Personal Use Only
www.jainelibrary.org
