________________
सिरिभुयणसुंदरीकहा ॥ नाणं हि जओ मुणिवर ! पच्चयसारं जए भणियं ।।१८५०।। ता भयवं ! जह एयं पच्चक्खं पयडियं तए मज्झ । तह नाह ! कहसु संपइ परलोयसुहं परमधम्मं ।।१८५१।। तो कहइ केवली कुलवइस्स पुव्वावरेण अविरुद्धं । धम्मं सिवतरुमूलं कल्लाणपरंपरानिलयं ।।१८५२।। “सो धम्मो कायव्वो जो किर सव्वन्नुणा समक्खाओ । नहि अइरिदियनाणं सव्वन्नुविवज्जियं होइ ॥१८५३।। सासयसिवसुहहेऊ धम्मो च्चिय होइ नत्थि संदेहो । सो उण सव्वन्नुविणिच्छिओ परं होइ आदेसो(ओ) ।।१८५४।। गयरागदोसमोहो निदड्डकम्मिंधणो धुयकिलेसो । केवलनाणालोओ इय जीवो होइ सव्वन्नू ।।१८५५।। सो साहेइ जहत्थं पिउ व्व वेसो व्व नत्थि से को वि । संसारच्छेयकरं परलोयसुहावहं धम्मं ।।१८५६।। जह उइए दिणनाहे वियसंति असेसकमलसंडाई । एवं सहावभणिरे जिणंमि बुझंति भुयणाई ।।१८५७।। तं सव्वन्नुपणीयं सिवसुहसंपत्तिकरणमुवयारं । अवितहमभव्वदुलहं धम्ममिणं निसुण ! साहेमि ।।१८५८।। खंत्ती य मद्दवज्जव-मुत्ती तव-संजमे य बोधव्वे । सच्चं सोयं आकिंचणं च बंभं च जइधम्मो ||१८५९।। कारण-अकारणेहिं य कुद्धे दुव्वयणभासए भणिरे । उवसंतमणेण परे जइणा खंती करेयव्वा ।।१८६०॥ धम्मो दयापहाणो दया वि कह होइ खंतिरहियस्स ? ।
Jain Education International
For Private & Personal Use Only
www.jainelibrary.org
