________________
सिरिभुयणसुंदरीकहा ॥
परियडइ गिरियडेसुं गिरिनइपुलिणेसु काणणवणेसु । वणसरवरेसु वीरो उज्जाण-वणेसु रम्मेसु ।।१७५२।। अन्नायकुलववत्थो अमुणियपिउ-माइ-सयणसंबंधो । देवकुमारो व्व मणोहरागिई पयइदुद्धरिसो ।।१७५३॥ अह अन्नया भवं(म)तो संपत्तो गिरनईए पुलिणम्मि । पेच्छइ तावसलोयं देवच्चण-ण्हाण-जवनिरयं ।।१७५४।। सो तेहिं तावसेहिं सविम्हउब्भंतनयणवत्तेहिं । दिट्ठो अदिट्ठपुव्वो परोप्परं कयवियप्पेहिं ॥१७५५।। किं एस कोइ विज्जाहरिंदपुत्तो व्व भमइ भयरहिओ । नमि-विनमिवंसजाओ पंचसिहासोहियसिरग्गो ? ॥१७५६।। अहवा वि भूमिगोयर-नरिंदपुत्तो व्व एस संभविही । कारणवसेण केणवि समागओ एत्थ रन्नम्मि ॥१७५७।। पेच्छइ अदिट्ठपुव्वं माहप्पमिमस्स रायपुत्तस्स । जं च्छत्तमणालंबं पडंति चमरा य निरवेक्खा ॥१७५८॥ एसो य परियणो से अमाणुसायारसरिसववहरणो । ता किं देवकुमारो कहनहा देवपरिवारो ? ॥१७५९।। इय एवमाइबहुविह-वियप्प-संकप्पसंकुलमईण । तावसमुणीण पासं समागओ वीरसेणो वि ।।१७६०॥ तो परियणेण भणियं देव ! इमे तावसा, कुण पणामं । तो सव्वतावसाणं जहक्कम पणमइ कुमारो ।।१७६१।। तो तावसेहिं जुगवं सायरवयणहिं उन्नयकरहिं । अहिणंदिओ कुमारो अवितहआसीसदाणेण ॥१७६२।।
12
Jain Education International
For Private & Personal Use Only:
www.jainelibrary.org
