________________
१४८
सिरिभुयणसुंदरीकहा ॥ तो संधिऊण करणं हरिसेणो जाव एइ सूररहं । ' ता अद्धपहे अद्धिंदु-खंडिओ पडइ धरणीए ॥१६०९॥ पडिए हरिसेणनरा-हिवम्मि तो सूरसेणलोएहिं । निहओ निहओ त्ति समं कलयलसद्दो समुग्घुट्ठो ॥१६१०॥ कलयलसद्दवियंभिय-अमरिसवसविप्फुरंतअहरोहो । उठेइ अहिनिविट्ठो द्रविडनरिंदो दुराधरिसो ॥१६११।। नामेण अमरतेओ जलहरगंभीरधीरसद्देण । हक्कुंतो सूरबलं वयणमिणं भणिउमाढत्तो ।।१६१२।। किं एत्थ कोल्हुयाण व तुम्हाणं कलयलेण किर होइ ? । किं ओहटे चुलुए सायरसलिलाई सूसंति ? ।।१६१३।। तो भणइ सूरसेणो कुणसु करे अमरतेय ! कोयंडं । एयाण कलयलेणं किं कज्जं निप्फलेणम्ह ? ||१६१४।। नरनाह! घडसहस्सं झंपिज्जइ कहवि केणवि नएण । न उणो उच्छिखलजण-मुहाण इह ज्झंपणं अत्थि ।।१६१५।। तो भणइ अमरतेओ एवमिणं किंतु हाहि मह समुहो । जेण तुह सूरनरवर ! नियसामत्थं पयासेमि ।।१६१६।। तो भणइ सूरसेणो कइयावि परम्मुहो रणे नाहं । पयडसु नियसामत्थं किं बहुणा एत्थ भणिएण ? ||१६१७॥ सहसारोवियधणुगुण-पकडणुल्लसियघोरघोसेण । एक्कमुट्ठीए मुक्का तीस सरा अमरतेएण ॥१६१८॥ सूरेण वैरिबाणा तावंतसरेहिं खंडिया तुरियं । जा न कुणइ संधाणं ता पुण सूरेण दह मुक्का ।।१६१९।।
Jain Education International
For Private & Personal Use Only
www.jainelibrary.org
