________________
१२६
सिरिभुयणसुंदरीकहा ॥ अह पेसिऊण भइणिं कुमरो विय अप्पणा इहं पत्तो । अम्हेहिं समं, सेसं अओ परं तुम्ह पच्चक्खं ।।१३६७।। एत्थावसरे नरनाह-नियडनीसेसवीरपुरिसेहिं । खित्ता कुमारसमुहं पहरिसवसवियसिया दिट्ठी ॥१३६८।। पुणरुत्तं वारविलासिणीहिं पहरिसवसट्टपुलयाहिं । मुक्का अलक्खरूवा कुमरे तरलच्छिविच्छोहा ।।१३६९।। तो नरवइणा भणियं जं अच्छरियं जणेइ गरुयाण । एयस्स पुणो तं च्चिय नियचरियं जणइ गुरुलज्ज ।।१३७०।। संपइ तिणमोडणनीसहा वि गरुयत्तणं पयासेंति । एवंविहा उण पुणो संतंपि हु निण्हवंति तयं ।।१३७१।। करुणा तप्पडियारो अप्पविणासे वि विक्कमो नयवं । कोसल्लं दक्खत्तं सत्तुजओ उवसमाइ(ई)या ॥१३७२।। जे केइ एत्थ भुयणे गुणाणुबंधा गुणा बुहाणं पि । ते सव्वे ठाणंतर-मलहंता एत्थ लीण व्व ॥१३७३।। अम्हारिसाण तुम्हारिसेसु सिक्खा-सहावगरुएसु । निव्विसया आयासं संकोयइ को समत्थो व्वि (?वि) ।।१३७४।। जो विक्कमेण गयणे असज्झविज्जाहरं पि निज्जिणइ । कुमरस्स तस्स हासो मन्नो करिकीडसंजमणं ! ॥१३७५।। ता तुज्झ जाव न समइ विज्जाहरसंगरुब्भवो खेओ । तक्खणमेत्तेणं चिय पुण जाओ वारणायासो ।।१३७६।। वीसमसु ता सुहेणं गच्छसु आवासमिइ नरिंदेण । भणिया कुमार-खयरा समं गया पुव्वआवासं ।।१३७७।।
Jain Education International
For Private & Personal Use Only
www.jainelibrary.org
