________________
सिरिभुयणसुंदरीकहा ॥
१२५ तो भणइ पउमएवी अहमेव परं न रक्खिया तुमए । खलखयररक्खसाओ बंधव ! परिरक्खियं भुवणं ।।१३५६।। तं सामी तं बंधू तं जणणी तं पिया गुरू तं सि । तं पाणदायगो मह कुमार ! तं किन्न जं न होसि (?) ||१३५७॥ नीसेसभुयणपालण-अच्चब्भुयन्नायपुन्नपब्भारो । आचंदक्कं नंदसु संपत्तसमीहिओ सययं ।।१३५८।। एण्हं पि कामरूवे पुरिं पुराजोइसिं अविग्घेण । पावेमि मह पई विय पत्तियइ तहा तुमं कुणसु ॥१३५९।। एत्थावसरे भणियं नरिंद ! मह भाउणा सुवेगेण । मह कहसु देव ! कज्जं जं सझं मारिसजणस्स ||१३६०।। अम्हे निक्कारिमपोरुसाइगुणवित्थरेण तुह बद्धा । आजम्मकम्मकारा भिच्चा ता देहि आएसं ॥१३६१।। तो तं सुवेगवयणं पडिपूरंतेण पुण मए कुमरो । वीसंभट्ठा(ठ)णमेसो इमीए सह जाउ इय भणिओ ||१३६२।। जा तुम्ह देव ! भइणी सा जणणी होइ निच्छियमिमस्स । ता निव्विसंकहियओ पेससु मा कुणसु संदेहं ॥१३६३॥ कुमरेण तओ भणिया अत्थवइपिया पसन्नवयणेहिं । गच्छसु सुवेयसहिया नियगेहं भइणि ! नीसंका ।।१३६४।। तो भणइ पउमएवी तुम्हाएसा घरम्मि वच्चंती । न करेमि मणे संकं विसेसओ सह सुवेगेण ॥१३६५।। तह तुमए वत्तव्वो अत्थवई पउमएविकज्जम्मि । जह नीसंको जायइ सुवेयमिय भणइ कुमरो वि ॥१३६६॥
Jain Education International
For Private & Personal Use Only
www.jainelibrary.org
