________________
सिरिभुयणसुंदरीकहा ॥
पयईए विसमसीलं कढोररविकिरणजायबहुकोवं । मारियबहुपरिकारं निरंकुसं कह वसे काही ? ॥१२६८।। इय जा चिंतइ ताओ ता तुरियं निउणबुद्धिणा तेण । तक्खणमेत्तेणं च्चिय वसीकओ वारणो विसमो ॥१२६९।। उग्घुट्ठजयजयरवं असेसजणदिन्नविविहआसीसं । पसरंतनयरराउल-जणनिवहं राउलं जायं ।।१२७०।। अह कुमरोवरि सहसा मुक्का विज्जाहरेहिं गयणाओ । रुंदंतमहुरमहुयर- वरमुहलियकुसुमवरवुट्ठी ।।१२७१।। तह कहवि तेण तइया सो हत्थी दुव्विणीयपयई वि । . भद्दत्तणम्मि ठविओ जह बालाणं पि सुहगेज्झो ।।१२७२।। नियपरियणविज्जाहर-परियरिओ हत्थिखंभठाणम्मि । गंतूण ठवइ हत्थिं करिणिगओ एइ रायउलं ॥१२७३।। तो भवणंतसुहासण-परिसंठियतायचरणकमलेसु । पणमइ भूतलविलुलिय-चलकुंडलहारसियदामो ||१२७४।। 'उवविससु'त्ति सपणयं भणिओ ताएण पुवठवियम्मि ।
सो विट्ठरे बइठ्ठो ‘महापसाओ'त्ति भणिऊण ॥१२७५।। विज्जाहरलोयस्स वि जहारुहं आसणाइपडिवत्तिं । काऊण पुणो ताओ सप्पणयं भणइ रायसुयं ।।१२७६।। किं एयमसद्धेयं अदिट्ठपुव्वं असंभवसरूवं । तुह चरियं गरुयाण वि जं जणइ मणे चमक्कारं ! ||१२७७॥ ता कहसु असमकोउय-तरलियहिययाण निययवुत्तंतं । अम्हाण जेण जायइ संतोसरसाहियं हिययं ।।१२७८।।
Jain Education International
For Private & Personal Use Only
www.jainelibrary.org
