________________
११६
सिरिभुयणसुंदरीकहा ॥ वामेयरकोमलकरयलग्ग-आसंघिएक्कखयरंसो । अइचवलदीहलोयण-पहाहिं नयरं व धवलंतो ।।१२५७।। अवमन्निय गुरुगयभय-भरेहिं पहरिसपयट्टपुलएहिं । सो नहयलाउ एंतो लोएहिं पलोइओ कुमरो ।।१२५८॥ कुमरालोयणपहरिस-वसकलयलकुवियकरडिकुंभयडे । ठविऊण पायकमलं उवविट्ठो कंठदेसम्मि ।।१२५९।। सहसा आरूढे च्चिय सीहकिसोरे व तक्खणं कुमरे । निफंदावयवतणू गयगव्वो गयवरो जाउ(ओ) ॥१२६०।। एत्थंतरम्मि दिट्ठो ताएण सपरियणेण गयखंधे । बहुपहरिसपरिपूरिय-हियएण य संथुओ एवं ॥१२६१।। पन्नायर ! सच्चमिणं “तत्थ गुणा जत्थ आगिई होइ” । एयम्मि निव्वियप्पं वयणमिणं घडइ कुमरम्मि ॥१२६२।। नीसेसदोसभरिए संसारे ठाणमलहमाणेहिं । मन्ने सव्वगुणेहिं वि निहोसो एस आयरिओ ।।१२६३॥ जाणे गुणाणुरत्तं हयदोसमिमं गुणेहिं लद्रूण । आसयवसहिडेहिं बंधूहिं व दूरमुल्लसियं ।।१२६४।। आसंघियदोसुदयं चंदस्स वि चेट्ठियं न सलहामो । निन्नासियदोसुदयं सूरस्स परं जए फुरियं ॥१२६५।। इय एवमाइ बहुविह- तग्गयगुणसंकहापसत्तमणो । पनायरेण ताओ पडिभणिओ देव ! एवमिणं ॥१२६६।। तो हा हा भणिरेणं पुणरवि ताएण जंपियं एयं । एयं मणागमणुच्चि(चि)यमायरियं जं गए चडिओ ॥१२६७।।
Jain Education International
For Private & Personal Use Only
www.jainelibrary.org
