________________
१०९
सिरिभुयणसुंदरीकहा ॥
तुह केण वि रुव्व(रूव-)विलास-जोव्वणाइसयहरियहियएण । अणुरायपरवसेणं विरहविणोउ(ओ) कओ एस ॥११८०॥ सो उण सुणेहि सुंदरि ! तुज्झ समो समहिओव्व संभविही । लोयपसिद्धी वि इमा “सरिसा सरिसेसु रच्चंति" ||११८१।। उत्तमकुल-जाई(इ)जुओ विसेसगुणसंगओ य गरुयओ(गरुओ)य । जइ मह मई पमाणं ता तुह हिययम्मि सो वसिही ।।११८२।। नियजोग्गयाणुरूवा मणोरहा होति जेण गरुयाण । जा इच्छा नरवइणो सा कह रंकस्स संभवइ ? ।।११८३।। एवंति पभणिऊणं रायसुया भणइ सहि ! सुहासणए । एत्थेव उवविसामो खणमेत्तं मत्तवारणए ।।११८४।। एवं हवउत्ति तओ भणिऊण ट्ठियाओ तत्थ समयं पि । वीसंभपणयगब्भं विलासलच्छी पुणो भणइ ।।११८५।। सहि ! पडिवन्नं तुमए परिसविसुद्धीए तुह कहिस्सामि । ता साहसु तं संपइ विमाणचडियाए जं भणियं ॥११८६।। हिययभंतरपसरंत-सासथरहरियथूलथणवठ्ठा । किंपि परिभाविऊणं हियए अह भणइ चंदसिरी ॥११८७।। तं किंपि होइ कज्जं कहिज्जमाणं पि जं कुलीणेहिं । अप्पाणस्स वि लज्जं जणेइ दूरे च्चिय परस्स ।।११८८।। एकत्तो तुज्झ भयं अन्नत्तो मह मणम्मि सहि ! लज्जा । इय लज्जा-भयमीसा पसरंति वियप्पकल्लोला ।।११८९॥ जइ चेवं तहवि विलास-लच्छि ! नियहिययनिव्विसेसाए । तुह कहिए का लज्जा ? ता सुणसु भणामि हिययगयं ।।११९०।।
Jain Education International
For Private & Personal Use Only
www.jainelibrary.org
