________________
१०२
सिरिभुयणसुंदरीकहा ॥ अरुणमहामणिघणकिरण-नियरवित्थाररंजियदियंतं । मज्झट्ठियचंदसिरि-अणुरत्तमसोयहिययं व ॥११००॥ अह तत्थ नायरजणो विमाणनिक्खित्तनयण-मणपसरो । सुवियक्खणो वि जाओ उद्धमुहो पामरजणो व्व ।।११०१।। इय तं विमाणरयणं अणुच्चनहगमणलद्धसोहग्गं । सव्वजणसमुदएणं सहागयं सुंदरुज्जाणे ॥११०२।। जं सहइ सरसघणसोणपल्लवुल्लसियविविहतरुरायं । चंदसिरीदुल्लहदसणाणुरायं व पयतं ।।११०३।। नाणाविहवियसियसेय-कुसुमदलगंधलुद्धभमरउलं । विउरुव्वियनयणेहिं च नियइ व्व सुरुव्वचंदसिरिं ॥११०४।। वियसंतसरसतरुनियरमंजरीजालजडिलियाधययं(?) । चंदसिरीसंगमसंभवंत-पुलयं व जं सहइ ||११०५।। पवणुद्धयपुप्फपराय-पडलपरिपिंजरंतरदियंतं । जं किरइ रायधूया-महंमि पिट्ठाय चुन्नं व।।११०६।। इय तम्मि विविहतरुसंड-मंडलीपुव्वसंठियजणम्मि । उज्जाणे पविसइ खुडिय-फुल्लपयरच्चिए बाला ।।११०७।। अह पेच्छइ नाणाविह-वइयरपेच्छणय-रास-हासघणं । उज्जाणं चंदसिरी नहसंठियवरविमाणठिया ।।११०८।। तो चंदसिरी भणिया विलासलच्छीए पेच्छ सहि ! एत्थ । साहीणपिययमजणो कह कीलइ तरुणजुयइजणो ।।११०९।। घणकत्थूरीकसिणंगरायपरिवत्तियंगसब्भावो । वेलवइ अन्नपुरिस-त्तणेण इह कोइ नियदइयं ।।१११०।।
Jain Education International
For Private & Personal Use Only
www.jainelibrary.org
