________________
सिरिभुयणसुंदरीकहा ॥ तं तस्स उदारासय-ववहरणं पेच्छिऊण खयरस्स । नरवइपमुहाण मणे संजाओ गुरुचमक्कारो ॥१०५६।। तो नरवइणा भणिया चंदसिरी पुत्त(त्ति)! गेण्हसु विमाणं । तुह पुन्नफलं एयं उवट्ठियं किं वियारेण ? ।।१०५७।। एवं ति पभणिऊणं चंदसिरी राइणा अणुन्नाया । नमिऊण गया जणणी-पासम्मि सहीहिं परियरिया ।।१०५८।। तयणंतरं नरिंदो नमंतसामंतमौलिमालाहिं । कयचरणकमलपूओ विजयवईए गउ(ओ) पासं ।।१०५९।। तत्थ वि असोय-सेहर-विज्जाहरवइयराणुवाएण । जावच्छइ खणमेत्तं पियाए ता सो इमं भणिओ ।।१०६०।। नरनाह ! नियपरिग्गह-पउरजणेणं च परिगया धूया । वच्चउ पहायसमए कीलुज्जाणं विमाणेणं ।।१०६१।। तो नरवइणा भणियं किं कोइ पिए!महोच्छवविसेसो । पच्चूसे जत्ता वा विसेसओ कस्स वि सुरस्स ? ||१०६२।। अहव विमाणारोहण-कोऊहलपरव्वसाए धूयाए । अब्भत्थिया सि सुंदरि ! तेण तए अहमिमं भणिओ ? ||१०६३।। तो भणइ रायपत्ती न घडइ पुव्वुत्तकारणवियप्पो । नरनाह ! अत्थि गरुयं अन्नं चिय कारणं किं पि ।।१०६४।। ता कहसु त्ति पभणिए नरिंदचंदेण भणइ विजयवई । तुच्छे वि रयणलाहे महोच्छवो होइ कायव्वो ॥१०६५।। किं पुण असेसभुयणं-तरालपरिभव(म)णपवणवेगस्स । अइसयविज्जादेवी-समहिट्ठियगुरुपहावस्स ॥१०६६।।
Jain Education International
For Private & Personal Use Only
www.jainelibrary.org
