________________
सिरिभुयणसुंदरीकहा ॥ तयणंतरं असोओ चित्ते चिंतेइ जाव सेहरओ । इह चिट्ठइ ताव न मे निव्विग्घं होइ चंदसिरी ॥१०३४।। ता कह वंचेमि इमं विज्जा-सारीरबलसमब्भि(ब्भ)हियं । सेहरयं समरंगण-लद्धजयं सयलजयसुहडं ||१०३५।। एत्थंतरम्मि सहसा गयणाओ विणिंतरुहिरपब्भारं । दट्ठोट्ठभिउडिभीमं अत्थाणे निवडियं सीसं ।।१०३६।। घोलंतकन्नकुंडल-किरीडमणिसोणकिरि(र)णविच्छू(च्छु)रियं । पडिवक्खकोवहुयवह-कवलियमिव वहइ अप्पाणं ।।१०३७।। तलगयमउडनिवेसं उद्धट्ठियवयणभासुरं सहइ । छिन्नं पि हु रोसवसा नियइ व्व नहम्मि पडिवक्खं ॥१०३८॥ तं सेहरेण सहसा हाहत्ति पजंपिरेण सच्चवियं । निउणयरनिहियनयणं ससंकमिव पभणियं एयं ।।१०३९।। नहसेहरस्स एवं सीसमहो ! केण पावकम्मेण । मह लहुयभाउणो इह निवाडियं धरणिवट्ठम्मि ? ॥१०४०॥ तयणंतरं च तस्स य मणदइया पणइणी विणयलच्छी । नामेण समोइन्ना गंडंतलुलंतघणकेसा ॥१०४१॥ हा अज्जउत्त ! गयणे वच्चंताणम्ह चंडवेगेण । तुह समुहमागएणं भण कीस निवाडियं सीसं ? ||१०४२॥ अह सेहरो रुयंती(ति) भाउज्जायं नियच्छिउं तयणु । दढजायपच्चओ सो कोवारुणलोयणो भणइ ।।१०४३।। मा रुयसु तुमं सुंदरि ! मग्गं मह कहसु जेण सो नट्ठो । इय सेहरेण भणिया रुयमाणी सा इमं भणइ ।।१०४४।।
Jain Education International
For Private & Personal Use Only
www.jainelibrary.org
