________________
९३
सिरिभुयणसुंदरीकहा ॥
सेहरकुमरेण तओ मह गीयविसेसियं कयं गीयं । निसुएण जेण दूरं गीयमओ मज्झ वि पणट्ठो ॥१००१।। विरए इमम्मि पुणरवि जिओ म्हि एएण इय मईए मए । तग्गीयविसेसगुणं जिणपुरओ गाइयं गीयं ।।१००२।। इय अन्नोन्नविवट्टिय(ड्डिय) गुणमच्छरजायछलविवायाण । दोहिं पि अम्ह जाओ अइगरुओ कलयलो तत्थ ॥१००३।। तयणंतरं च भणिओ सेहरकुमरो मए जहा एत्थ । किं कलयलेण जामो समहियगुण-सन्निहाणम्मि ।।१००४।। तो सेहरेण भणिओ न मच्चलोयम्मि समहिओ को वि । इह अत्थि जो अव(जोऽव)णेही मह तुज्झ वि गुणविसंवायं ।।१००५।। एत्थंतरम्मि एगो तव्वेलमुवागओ सुरो तत्थ । तेणम्हे पडिभणिया नरलोयं कीस निंदेह ? ||१००६।। इह अज्जवि नरलोए गुणिणो ते संति जाण गुणगरुओ । चरणरओ वि न सक्का वोढुं विज्जाहर-सुरा वि ॥१००७।। तं सोऊण दुवेहिं वि पुरओ ठाऊण तस्स तियसस्स । भणियं कहेहि को सो गुणाहिओ मच्चलोयम्मि ? ||१००८।। तियसेण तओ भणियं नासिकपुरे विचित्तजसराया । विजयवई से भज्जा अत्थि सुओ तीए दुहिया य ॥१००९।। चंदजसो चंदसिरी नामाइं कमेण ताण इय होति । न हु ताण गुणब्भहिओ पुरिसो जुयइ व्व भुयणम्मि ।।१०१०।। ता दोण्हं पि हु निययं गुणजणिओ एस जो अहंकारो ।। तुम्हं तीसे सो वि हु फिट्टिहइ न एत्थ संदेहो ॥१०११।।
Jain Education International
For Private & Personal Use Only
www.jainelibrary.org
