________________
महानिसीह-सुय-खंधं
१११
अण्णया थेरी चिंतेइ 'मज्झं बोडाए जारिसं । लावण्णं कंती-रूवं नत्थि भुवणे वि तारिसं ।।२५७|| ता विरंगामि एईए कण्णे णक्कं सहोट्ठयं । एसा उ ण जाव विउप्पज्जे मम धूयं को वि णेच्छिही ॥२५८।। अहवा हा हा ण जुत्तमिणं, धूया तुल्लेसा वि मे। णवरं सुविणीया एसा, विउप्पन्नत्थ गच्छिही ॥२५९।। ता तह करेमि जहा एसा देसंतरं गया वि य। न लभेज्जा कत्थइ थामं, आगच्छइ पडिल्लिया ।।२६०॥ देवेमि' से वसी-करणं, गुज्झ-देसं तु साडिमो। निगडाइं च से देमि' भमडउं तहिं नियंतिया ॥२६१॥ एवं सा जुण्ण-वेसज्जा मणसा परितप्पिउं सुवे। ता खंडोट्ठा वि सिमिणम्मि गुज्झं साडिज्जंतगं ।।२६२।। पेच्छइ नियडे य दिज्जंते कण्णे णासं च वढियं । सा सिमिणत्थं वियारेउं णट्ठा जह कोई ण याणइं ॥२६३।। कह कह वि परिभमंती सा गाम-पुर-नगर-पट्टणे। छम्मासेणं तु संपत्ता संखडं नाम खेडगं ॥२६४।। तत्थ वेसमण-सरिस-विहव-रंडा-पुत्तस्स सा जुया । परिणीया महिला ताहे मच्छरेण पज्जले दढं ॥२६५॥ रोसेण फुरफुरंती सा जा दियहे केइ चिट्ठइ। निसाए निब्भरं सइयं खंडोठी ताव पेच्छइ ॥२६६|| तं दुटुं धाइया चुल्लिं दित्तं घेत्तुं समागया। तं पक्खिविऊण गुज्झते फालिया जाव हिययं ।।२६७।। जाव दुक्ख-भरकंता चल-चल्लचेल्लिं करेंतो। ता सा पुणो विचिंतेइ ‘जाव जीवं ण उड्डए ॥२६८॥ ताव देमी से दाहाइं जेण मे भव-सएसु वि। न तरइ पिययमं काउं इणमो पडिसंभरंतिया' ॥२६९।। ताहे गोयम ! आणेउं चक्किय-सालाओ अयमयं । तावित्तु फुलिंग मेल्लंतं जोणिए पक्खित्तंकुसं ॥२७०।। एवं दुक्ख-भरकंता, तत्थ मरिऊण गोयमा ! उववन्ना चक्कवट्टिस्स महिला-रयणत्तेण सा ॥२७१।। इओ य रंडा-पुत्तस्स महिला तं कलेवरं । जीवुज्झियं पि रोसेण छेत्तुं छेत्तुं सुसंमयं ॥२७२॥ साण-काग-मादीणं जाव घत्ते दिसोदिसिं। ताव रंडा-पुत्तो वि, बाहिरभूमीओ आगओ ॥२७३।। सो य दोस-गुणे गाउं, बहुं मणसा वियप्पियं । गंतूण साहु-पामूलं, पव्वज्जं काउ निव्वुडो ॥२७४।।
१ देदेमि जे. देसेमि खं. । २ उट्ठए ला. ।
Jain Education International
For Private & Personal Use Only
www.jainelibrary.org
