Page Text
________________
महानिसीह-सुय-खंधं .
दिणाइक्कमेणं मज्जमंसोवरि दढं गेही संजाया । ताहे तस्सेव रस-वाणिज्जगस्स गेहाओ परिमुसिऊणं किंचि-कंस-दूस-दविण-जायं अण्णत्थ विक्किणिऊणं मजं मंसं परिभुंजइ। तावणं विण्णायं तेण रसवाणिज्जगेणं साहियं च नरवइणो। तेणा वि वज्झा-समाइट्ठा।
[३७] तत्थ य रायउले एसो गोयमा ! कुल-धम्मो । जहा णं जा काइ आवण्ण-सत्ता नारी अवराह-दोसेणं सा जावणं णो पसूया ताव णं नो वावायव्वा । तेहिं विणिउत्त-गणिगिंतगेहिं सगेहे नेऊण पसूइ समयं जाव णियंतिया रक्खेयव्वा। __ अहण्णया णीया तेहिं हरिएस-जाईहिं स-गेहं । कालक्कमेण पसूया य दारगं । तं सावज्जायरिय जीवं। तओ पसूयमेत्ता चेव तं बालयं उज्झिऊण पणट्ठा मरणभयाहितत्था सा गोयमा ! दिसिमेक्कं गंतूणं वियाणियं च तेहिं पावेहिं । जहा-पणट्ठा सा पाव-कम्मा । साहियं च नरवइणो सूणाहिवइणा । जहा णं देव ! पणट्ठा सा दुरायारा कयली-गब्भोवमं दारगमुज्झिऊणं' । रण्णा वि पडिभणियं जहा णं 'जइ णाम सा गया ता गच्छउ तं बालयं पडिवालेज्जासु सव्वहा तहा कायव्वं जहा तंबालगंण वावज्जे। गिण्हेसुइमे पंच-सहस्सा दविण-जायस्स। तओ णरवइणो संदंसेणं सुयमिव परिवालिओ सो पंसुली-तणओ। ___ अण्णया कालक्कमेणं मओ सो पाव-कम्मो सूणाहिवई । तओ रण्णा समणुजाणियं तस्सेव बालगस्स घरसारं। कओ पंचण्हं सयाणं अहिवई । तत्थ य सुणाहिवइ पए पइट्ठिओ समाणो ताई तारिसाइं अकरणिज्जाइं समणुट्टित्ताणं गओ सो गोयमा ! सत्तमीए पढवीए अपइवाण-नामे निरयावासे सावज्जायरिय-जीवो। एवं तं तह घोर-पचंड-रोदं सुदारुणं दुक्खं तेत्तीसं सागरोवमे जाव कह कहवि किलेसेणं समणुभविऊणं इहागओ समाणो उववण्णो अंतरदीवे एगोरुयजाई । तओ वि मरिऊणं उववण्णो तिरिय-जोणीए महिसत्ताए । तत्थ य जाइं काई वि णारग-दुक्खाई तेसिं तु सरिस-नामाई अणुभविऊणं छव्वीसं संवच्छराणि । तओ गोयमा ! मओ समाणो उववण्णो मणुएसु, तओ वासुदेवत्ताए सो सावज्जायरिय-जीवो । तत्थ वि अहाऊयं परिवालिऊणं अणेगसंगामारंभ-परिग्गह-दोसेणं मरिऊणं गओ सत्तमाए । तओ वि उव्वट्टिऊणं सुइर-कालाओ उववण्णो गय-कण्णो नाम मणुय-जाई । तओ वि कुणिमाहारदोसेणं कूरज्झवसायमईगओ, मरिऊणं पुणो वि सत्तमाए । तेहिं चेव अपइट्ठाणे णिरय-वासे तओ वि उव्वट्टिऊणं पुणो वि उववण्णो तिरिएसुं महिसत्ताए।
[३८] तत्था वि णं नरगोवमं दुक्खमणुभवित्ता णं मओ समाणो उववन्नो बाल-विहवाए पंसुलीए माहण-धूयाए कुच्छिंसि । अहण्णया निउत्त-पच्छण्ण-गब्भ-साडण-पाडणे खार-चुण्णजोगदोसेणं अणेगवाहि-वेयणापरिगय-सरीरो सिडिहिडंत- कुट्ठ-वाहिए परिगलमाणो सलसलिंत-किमिजालेणं खज्जंतो नीहरिओ नरओवमं घोर-दुक्ख-निवासो गब्भवासाओ गोयमा ! सो सावज्जायरियजीवो। __ तओ सव्व-लोगेहिं निंदिज्जमाणो, गरहिज्जमाणो, खिंसिज्जमाणो, दुगुंछिज्जमाणो सव्व-लोअपरिभूओ पाण-खाण-भोगोवभोग-परिवज्जिओ गब्भवास-पभितीए चेव विचित्तसारीर-माणसिग-घोर-दुक्ख-संतत्तो सत्त-संवच्छरसयाइं दो मासे य चउरो दिणे य जावज्जीविऊणं मतो समाणो उववण्णो वाणमंतरेसुं । तओ चुओ उववण्णो मणुएसुं । पुणो वि सूणाहिवइत्ताए । तओ वि तक्कम्मदोसेणं सत्तमाए । तओ वि उव्वट्टेऊणं उववण्णो तिरिएसुं चक्कियघरंसि गोणत्ताए।
तत्थ य चक्क-सगड-लंगलायट्टणेणं अहण्णिसं जवारोवणेणं पच्चिऊण कहियाउब्वियं खंधं, सम्मुच्छिए य किमी । ताहे अक्खमीहूयं खंध-जूव-धरणस्स विण्णाय पट्टीए वाहिउमारतो तेणं चक्किएणं । अहण्णया कालक्कमेणं जहा खंधं तहा पच्चिऊण कुहिया पट्टी। तत्था वि समुच्छिए किमी। सडिऊण विगयं च पट्ठि-चम्म।
१ घेत्तूण खं. । २ तओ सं. ला। ३ गओ खं. २। ४ लाइवहणेण ला. टि. ५। .. Jain Education International
For Private & Personal Use Only
www.jainelibrary.org
| SR No. | 001149 |
| Book Title | Agam 39 Chhed 06 Mahanishith Sutra |
| Original Sutra Author | N/A |
| Author | Punyavijay, Rupendrakumar Pagariya, Dalsukh Malvania, H C Bhayani |
| Publisher | Prakrit Granth Parishad |
| Publication Year | 1994 |
| Total Pages | 284 |
| Language | Prakrit |
| Classification | Book_Devnagari, Agam, Canon, Ethics, & agam_mahanishith |
| File Size | 19 MB |