________________
संबोध
प्रकरणम्:
कुंभारचक्कभमणं पढमं दंडाओ तओ वि तयभावे । वयणासंगाणुठ्ठाणं मेयकहणे इमं णायं ॥२३७ ॥ पढमं भावलवाओ पायं बालाइयाण संभवइ । तत्तो वि उत्तरुत्तरसंपत्ती नियमओ होइ ॥२३८॥ तम्हा चउविहंपि हु नेयभिणं पढमरूवगसमाणं । जम्हा मुणीण सव्वं परमपयनिबंधणं भणियं ॥ २३९॥ बीयगरूवसमं पुण सम्माणुठ्ठाणकारणत्तेण । एगंतेण न दु पुव्वायरिया जओ बिति ॥ २४० ॥ असढस्स अपरिसुद्धा किरिया सुद्धाइकारण होइ । अंतोविमलं रयणं सुहेण बझं मलं चयइ ॥ २४१ ॥ तइयगरूवगतुल्ला मायामोसाइदोससंपत्ता । कारिसरूवयववहारि-णोव्व कुज्जा महाणत्थं ॥ २४२ ॥ होइ य पाएणेसा अन्नाणाओ असद्दहणयाओ। कम्मस्स गरुत्ताओ भवाभिणंदीण जीवाणं ॥२४३॥ उभयविहीणाओ पुणो नियमाराहणविराहणा भणिया । विसयब्भासगुणाओ कयाइ हुज्जा सुहनिमित्तं ॥२४४ ॥ जह सावगस्स पुत्तो बहुसो जिणबिंबदंसणगुणेणं । अकयसुकओ वि मरिउं मच्छभवे पाविओ सम्मं ॥ २४५ ॥ भव्वाणं पुण होइ चरिमावत्तंमि चरिमकरणमि । पायमनायासाणं सम्मत्तगुणोवओगाणं ॥ २४६ ॥ तम्हा जिणभत्तीसु वयणाणुठ्ठाणमेव गुणहेऊ । तमणासायणपहवं करिज्जमाणं फलोवेयं ॥ २४७ ॥
मुत्त १ पुरीसं २ पाणु ३ वाणह ४ असण ५ सयणि ६ त्थि ७ तंबोलं८। निठ्ठीवणं ९ च जूयं १० जूयाइपलोयणं ११ विगहा १२ ॥ २४८ ॥ पल्हत्यीकरणं १३ पि हु पायपसारण १४ परोप्परविवाओ १५ । परिहासो १६ मच्छरिया १७ सिंहासणमाइपरिभोगो १८ ॥ २४९ ।।
Jain Education International
For Private & Personal Use Only
www.jainelibrary.org
