Avoid Clashes Kannada

SR No.: 034308
Original Sutra Author: N/A
Author: Dada Bhagwan
Publisher: Dada Bhagwan Aradhana Trust
Total Pages: 38
Language: Kannada
Classification: Book_Other
File Size: 3 MB

Page 7

ಸಂಪಾದಕೀಯ
'ಸಂಘರ್ಷಣೆಯನ್ನು ತಪ್ಪಿಸಿ' ಎಂಬ ಈ ಒಂದು ವಾಕ್ಯವನ್ನು ಜೀವನದಲ್ಲಿ ಅಂತರ್ಗತ ಮಾಡಿಕೊಂಡವರ ಜೀವನವು ಸುಂದರವಾಗುವುದ್ದಲ್ಲದೆ, ಅವರಿಗೆ ಮೋಕ್ಷವು ಕೂಡಾ ಅತಿ ಶೀಘ್ರದಲ್ಲಿ ಸಮ್ಮುಖವಾಗಿ ಬಂದು ನಿಲ್ಲುವುದು! ಇದು ನಿರ್ವಿವಾದದ ವಾಕ್ಯವಾಗಿದೆ.
ಅಕ್ರಮ ವಿಜ್ಞಾನಿ ಸಂಪೂಜ್ಯ ದಾದಾಶ್ರೀಯವರು ನೀಡಿರುವಂತಹ ಈ ಸೂತ್ರವನ್ನು ಅಳವಡಿಸಿಕೊಂಡ ಎಷ್ಟೋ ಜನರು ಸಂಸಾರ ಸಾಗರದಿಂದ ದಡ ಸೇರಿದ್ದಾರೆ! ಅವರೆಲ್ಲರೂ ಜೀವನದಲ್ಲಿ ಸುಖ-ಶಾಂತಿಯನ್ನು ಹೊಂದುವುದರ ಜೊತೆಗೆ, ಮೋಕ್ಷ ಮಾರ್ಗಿಗಳಾಗಿದ್ದಾರೆ. ಇದಕ್ಕಾಗಿ ಜೀವನದಲ್ಲಿ ಪ್ರತಿಯೊಬ್ಬರು ಕೇವಲ ಒಂದೇ ಒಂದು ದೃಢ ನಿಶ್ಚಯವನ್ನು ಮಾಡಬೇಕಾಗಿದೆ. ಅದೇನೆಂದರೆ, “ನಾನು ಯಾವುದೇ ರೀತಿಯ ಸಂಘರ್ಷಣೆಗಳಿಗೆ ಒಳಪಡಬಾರದು. ಎದುರಿನವರು ಎಷ್ಟೇ ತಾಕಿಸಿಕೊಂಡು ಓಡಾಡುತ್ತಿದ್ದರೂ, ಅದು ಏನೇ ಆಗಿರಲಿ, ನಾನು ಮಾತ್ರ ಸ್ಪಂದಿಸುವುದಿಲ್ಲ.' ಹೀಗೆ ನಿಶ್ಚಯ ಮಾಡಿಬಿಟ್ಟರೆ, ಅಷ್ಟೇ ಸಾಕು. ಅಂತಹವರಿಗೆ ಪ್ರಾಕೃತಿಕವಾಗಿ ಒಳಗಿನಿಂದಲೇ ಸಂಘರ್ಷಣೆಯನ್ನು ತಪ್ಪಿಸುವ ಅರಿವು ಮೂಡುತ್ತದೆ.
ರಾತ್ರಿ ಕತ್ತಲಲ್ಲಿ ಕೊಠಡಿಯಿಂದ ಹೊರಗೆ ಹೊರಟಾಗ ಎದುರಿಗೆ ಗೋಡೆ ಅಡ್ಡ ಬಂದರೆ ಏನು ಮಾಡುತ್ತೇವೆ? ಗೋಡೆಯೊಂದಿಗೆ ಸಿಟ್ಟು ಮಾಡಿಕೊಂಡು, 'ನೀನು ಯಾಕೆ ಅಡ್ಡ ಬಂದೆ, ಇದು ನನ್ನ ಮನೆ' ಎಂದು ಜಗಳವಾಡಿದರೆ ಆಗುತ್ತದೆಯೇ? ಇಲ್ಲ, ಅಲ್ಲಿ ಎಷ್ಟು ಸರಳವಾಗಿ ಎದುರಿಗೇನು ಅಡ್ಡ ಸಿಕ್ಕಿದರೂ ತಡಕಾಡುತ್ತಾ ಬಾಗಿಲನ್ನು ಹುಡುಕಿಕೊಂಡು ಹೊರಗೆ ಬರಲು ಪ್ರಯತ್ನಿಸುತ್ತೇವೆ, ಯಾಕೆ? ಏಕೆಂದರೆ, ಅಲ್ಲಿ ನಮಗೆ ಅರಿವಿದೆ, ಗೋಡೆಗೆ ಹೊಡೆದುಕೊಂಡರೆ ನಮ್ಮ ತಲೆಗೆ ಪೆಟ್ಟು ಬೀಳುತ್ತದೆ ಎಂದು.
ಕಿರಿದಾದ ಬೀದಿಯಲ್ಲಿ ರಾಜನು ನಡೆದುಕೊಂಡು ಹೋಗುವಾಗ ಗೂಳಿಯೊಂದು ಓಡುತ್ತಾ ಎದುರಿಗೆ ಬಂದರೆ, ಆಗ ರಾಜ ಗೂಳಿಗೆ, 'ಯಾಕೆ ಹೀಗೆ ಅಡ್ಡ ಬರುತ್ತಿರುವೆ? ನನಗೆ ಜಾಗ ಬಿಡು. ಇದು ನನ್ನ ರಾಜ್ಯ, ನನ್ನ ಬೀದಿ, ನನಗೆ ರಸ್ತೆ ಬಿಡು' ಎಂದು ಹೇಳಲು ಹೋದರೆ, ಆಗ ಗೂಳಿ ಹೇಳುತ್ತದೆ. 'ನೀನು ರಾಜನಾದರೆ, ನಾನು ಮಹಾರಾಜ! ಬಾ ನೋಡೋಣ!' ಎಂದು. ಆಗ, ಎಂತಹ ಬಲಶಾಲಿಯಾದ ರಾಜಾಧಿರಾಜನಾಗಿದ್ದರೂ ಅಲ್ಲಿಂದ ಮೆಲ್ಲಗೆ ಜಾರಿಕೊಳ್ಳಲೇ ಬೇಕಾಗುತ್ತದೆ. ಹೇಗಾದರೂ ಸರಿ, ಚಾವಡಿಯ ಮೇಲೆ ಏರಿಯಾದರೂ ಪಾರಾಗಬೇಕಾಗುತ್ತದೆ. ಯಾಕಾಗಿ? ಆ ಸಂಘರ್ಷಣೆಯನ್ನು ತಪ್ಪಿಸುವ ಸಲುವಾಗಿ!