________________
જ્ઞાનનો મારગ. (ઢાળ - વૈષ્ણવજન તો તેને રે કહીએ)
૧. જ્ઞાનનો મારગ છે પુરુષાર્થનો, કેવળ શ્રદ્ધા ન ચાલે રે,
તર્કવિતર્ક કસોટી કરતાં, સ્વાનુભૂતિમાં મહાલે રે ... જ્ઞાન
૨. નહીં કોઈ મત કે નહીં કોઈ વાડા, નહીં કોઈ નિશ્ચિત ગ્રંથ રે,
ચિંતન મનન મથામણ કરીને, થાવાનું નિગ્રંથ રે.. જ્ઞાન
૩. નહીં કોઈ કંઠી નહીં કોઈ માળા, નહીં તિલક નહીં વાઘા રે;
નહીં કોઈ વાદવિવાદ કે ચર્ચા, જે જ્ઞાનથી રાખે આઘા રે ... જ્ઞાન
૪. અલિપ્ત માર્ગ છે જ્ઞાન કેરો જયાં, સાધનામાં રમવાનું રે;
તારી શકે નહીં કોઈ જીવનમાં, જાતે ત્યાં તરવાનું રે ... જ્ઞાન
૫. સત્ય પ્રકટ કરવાના સાધન, કાળક્રમે બદલાતા રે,
સત્ય રહે છે સદા સનાતન, વહેતા કાળ અનંતા રે ... જ્ઞાન
૬. હર કોઈ દ્રવ્યને મૂળ સ્વરૂપે, જુએ છે સમ્યક જ્ઞાની રે;
રાગ દ્વેષ વિણ સત્ય પ્રકાશે તે છે કેવળજ્ઞાની રે ... જ્ઞાન
૭. પાપકર્મથી પાછા વાળીને, કરાવે પુણ્યમાં વાસ રે,
કર્મની સત્તાને સમજાવે, તે છે જ્ઞાન પ્રકાશ રે ... જ્ઞાન
૮. કહે વિજય બે રાહ છે સાચા, જ્ઞાન અને ભક્તિના રે,
શક્તિ પ્રમાણે યુક્તિ કરતાં, મળતાં ફળ મુક્તિના રે ... જ્ઞાન
ભીતરનો રાજીપો * ૪૩
