________________
दसमो सन्धी
भाइहुं पुणु अविहत्थु हरंतहं दाइयमच्छरु हियह धरंतहं । . निग्गहु तुह्मि ताहं न करिव्वउ परजीवावहारि जीवेव्वउ । घत्ता । परियाणिवि लेउ भविसयत्तु अप्पणउं धणु।
आमिल्लहि सिट्टि करउ पुत्तु पाणिग्गहणु ॥ १३ ॥ जं विन्नत्तु पउरसंघाएं तं जि तेम पडिवजिउ राएं। बइसहु भविसयत्तु बोल्लावहु अवरुप्परु संतोसु करावहु । तो संगिलिउ पउरु अप्पाहिवि धणवइ पुत्तसहिउ पडिगाहिवि । अहो अहो भविसयत्त बहुमाणउं तुहुँ अम्हहं भूवालसमाणउं । बंधुयत्तु जं लेविणु आयउ तं धणु घरि संवरिअ विहायउ। जं वणगहणि खित्तु अणिओयहो तं अवराहु खमहिं पुरलोयहो । भणइं कुमारु कयंजलिहत्थउ महु नियजम्मु अज्जु सकयत्थउ । जं पुरलोएं वयणु कराविउ करहु किंपि जं मयरहो भाविउ ।
जे गय तहु सहाय ते पुच्छिवि पाणिग्गहणु करहु पडियच्छिवि। पत्ता । पुरु पुच्छइ तेवि करहु कज्जु जं जेम थिउ ।
तो तेहिं मिलेवि तजिवि दिदु संकेउ किउ ॥१४॥ गुज्झाचरणसीलसुनिउत्तहिं दिढु समवाउ करिवि वणिउत्तिहिं । सुअणत्तणगुणेण जं रक्खिउ तं पि अभउ मग्गेविणु अक्खिउ । अहो पुरपउरि केम साहारिउ अजवि एहु कज्जु निरु भारिउ । कहिं विवाहु कहिं सुह वधुयत्तहो कहिं निव्वुइ समवाएं गोत्तहो। एह वरजुवइ थाइ जा सारी सा गेहिणि भविसत्तहो केरी। अहो परमेसरि माय महासइ नामग्गहणि ताहि दुहु नासइ । काई न वुत्तु एण दुवियप्पें तोवि न चलिय सीलमाहप्पें । वुच्चइ तेही नारि पइव्वय हुअ पञ्चक्ख महाजलदेवय । धयवड भग्गु भरिवि दुव्वायहो हल्लोहलिउ चित्तु संघायहो । झल्लोज्झल्लिउ सलिलु रयणायरि सयलुवि जणु बुड्डतउ सायरि ।
ताहिं समासि एण साहारिउ जामहि बंधुयत्तु ओसारिउ । घत्ता । पणवंतइ लोइ जइ उवसमु न करंति सइ।।
तो वुड्डुइं आसि हुअ सव्वहं खयकालगइ ॥ १५ ॥ एहावत्थ जाय जणविंदहो वेलाउलि उत्तरिवि समुहहो । आएं अम्हि धरिवि निरु तजिय थिय कुलकित्तिकलंकहो लज्जिय ।
