________________
તેમના ગુણોનું બહુમાન તથા તેમની આજ્ઞાનું પાલન, તેની અંદર રહેનારા થાઓ તો સંપૂર્ણસિદ્ધ, અવિનાશી, અક્ષયાત્મક, અનંત ગુણસંપદા પામશો. પોતાના આત્માની જ ગુણસંપદા પ્રગટ કરવાનો આ જ પુષ્ટ ઉપાય છે. આ જ પુષ્ટ આલંબન છે.
॥ એકવીસમા શ્રી નમિનાથ જિનેશ્વર પ્રભુના સ્તવનના અર્થ સમાપ્ત થયા॥
બાવીસમા શ્રી નેમિનાથ પરમાત્માનું સ્તવન
નેમિ જિનેસર નિજ કારજ કર્યું, છાંડ્યો સર્વ વિભાવોજી ॥ આતમશક્તિ સકલ પ્રગટ કરી, આસ્વાદ્યો નિજભાવોજી ॥ નેમિ જિનેસર || ૧ ||
ગાથાર્થ :- બાવીસમા શ્રી નેમિનાથ પરમાત્માએ પોતાનું કાર્ય બરાબર કર્યું. અનાદિકાળથી વળગેલો વિભાવભાવ સર્વથા ત્યજી દીધો. આ આત્માની સંપૂર્ણ શક્તિ પ્રગટ કરીને પોતાનો જે શુદ્ધ નિરાવરણ સ્વભાવ હતો તેનું આસ્વાદન કર્યું. ॥ ૧ ॥
વિવેચન :- સંસારવર્તી સર્વે પણ જીવો શુદ્ધ સુવર્ણતુલ્ય અનંતઅનંત ગુણોથી ભરપૂર ભરેલા છે તેના ઉપર કર્મોનાં આવરણો લાગેલાં છે. તેના કારણે આત્માના ગુણો આચ્છાદિત થયેલા છે, પણ ગુણો નાશ નથી પામ્યા.
બાવીસમા શ્રી નેમિનાથ પરમાત્માનો આત્મા પણ આવો જ હતો. પરંતુ તેમણે પોતાના આત્માના ગુણો ઉપરનાં આવરણો એટલે કે વિભાવસ્વભાવ છોડવાનો પ્રયત્ન આદર્યો અને તેમાં સફળતા પ્રાપ્ત કરીને સર્વ વિભાવદશા રૂપ ગુણો ઉપરનાં આવરણોનો ત્યાગ કર્યો.
