________________
૧૭૬
શ્રી દેવચંદ્રજી કૃત ચોવીશી ભાગ ૧ ગાથાર્થ - આ પ્રમાણે વીતરાગ પરમાત્મામાં રહેલી અનંત પ્રભુતાની શ્રદ્ધા કરીને જે આત્મા પરમાત્માને પૂજે છે તે આત્મા દેવોમાં ચંદ્રમા સમાન એવી વીતરાગપણાની પ્રભુતાને પામે છે. જે પરમ આનંદના સ્વરૂપના વિલાસ રૂપ છે. (ગર્ભિત રીતે દેવચંદ્ર પ્રભુતા આ પદમાં કર્તાએ પોતાનું નામ સુચવ્યું છે.) I ૧૧ //
વિવેચન :- આ પ્રમાણે શ્રી શીતલનાથ પ્રભુમાં રહેલી અનંતી પ્રભુતા, પરમાત્મદશા, સર્વ આત્મપ્રદેશોમાં નિરાવરણતા રૂપે પ્રગટ થયેલી અનંત અનંત શુદ્ધ પર્યાયતા તથા કેવળજ્ઞાન કેવળદર્શનાદિ સકલ ગુણોની સંપૂર્ણપણે નિરાવરણતા (સર્વગુણોનો સંપૂર્ણપણે આવિર્ભાવ) આવા પ્રકારની અનંતી આત્મશક્તિ જે અનાદિકાળથી કર્મો વડે અવરાયેલી હતી. તેનો પ્રાદુર્ભાવ – પ્રગટીકરણ થયું છે. ઇત્યાદિની ભાવના ભાવતાં ભાવતાં તેની સાચા હૃદયથી શ્રદ્ધા કરતાં કરતાં સમ્યક્ત્વ ગુણ પ્રગટ થાય અને તેના દ્વારા પરમાત્માના ઉપરોક્ત સર્વગુણોની બહુમાનપૂર્વક યથાર્થ શ્રદ્ધા કરતાં કરતાં જે આત્મા પરમાત્માને પૂજે છે. તે આત્મા સર્વદેવોમાં ચંદ્રમા સમાન એવા વિતરાગ શ્રી અરિહંતપ્રભુની પ્રભુતાને પ્રાપ્ત કરે છે. જે પ્રભુતા પરમ આનંદ સ્વરૂપવાળી છે.
જેમ ઇયળ ભમરીનું ધ્યાન કરતી છતી ભમરી પણાને પામે છે. તેમ આ સંસારી આત્મા પરમાત્માનું બહુમાનપૂર્વક ધ્યાન કરતો છતો તે પોતે જ વીતરાગ અવસ્થાને પામે છે. આવા પ્રકારનો વીતરાગપ્રભુનો બહુ પ્રતાપી પ્રભાવ છે. | ૧૧ //
(ગર્ભિત રીતિએ દેવચંદ્ર પ્રભુતા આ પદમાં કર્તાએ પોતાનું નામ સુચવ્યું છે.) | ૧૧ છે.
શ્રી શીતલનાથ પરમાત્માનું સ્તવન સમાપ્ત થયું.
