________________
વિવેકી પુરુષ પ્રતિવર્ષે શક્તિ પ્રમાણે ચતુર્વિધ શ્રીસંઘની પૂજા કરે અને ગુરુભગવંતોને ભક્તિથી નિર્દોષ વસ્ત્રો વહોરાવે. ૧૮
વસતિ, અન્ન, પાણી, પાત્રાદિ ઉપકરણો અને ઔષધ અર્પણ કરવું, જો તેની પર્યાપ્ત શક્તિ ન હોય તો જેટલી શક્તિ હોય તે પ્રમાણે પણ આપવું. ૧૯
કુવો, બગીચો, ગાય વિ. દાન આપવાથી આપનારને જ સંપત્તિ પ્રાપ્ત થાય છે તો સુપાત્રમાં જે દાન અપાય છે તે આપવાથી સંપત્તિ ઘટતી નથી, પરંતુ વધે છે. ૨૦
દાનમાં આપવું અને જાતે ભોગવવું આ બેમાં મોટું અંતર છે. ખાધેલું વિષ્ટા બને છે જ્યારે દાનમાં આપેલું અક્ષય બને છે. ૨૧
સેંકડોં પ્રયત્નો પછી મેળવેલ, પ્રાણથી પણ અધિક ગણાતા એવા ધનની દાનમાં વાપરવું એ જ એક ગતિ છે. બીજી ગતિ તો વિપત્તિ માટે થાય છે. ૨૨ (અર્થાત ધન દાનમાં વાપરવાથી શ્રેય આપે અને ભોગમાં વાપરવાથી સંકટ આપે છે)
ન્યાયનીતિથી મેળવેલ પોતાનું ધન જે શ્રાવક સાતે ક્ષેત્રમાં આપે છે તે પોતાના ધનને અને જન્મને સફળ કરે છે. ૨૩
આ પ્રમાણે આચાર્ય શ્રીરત્નસિંહસૂરિના શિષ્ય શ્રીચારિત્રસુંદરગણી વિરચિત શ્રીઆચારોપદેશ ગ્રંથ પૂર્ણ થયો.
| શુભ ભવતુ શ્રી સંઘસ્ય.. | સકલ સંઘનું કલ્યાણ થાઓ !
