________________
दीघनिकाये पाथिकवग्गटीका
(२.५७-५८)
अत्ततण्हाविनोदनवसेन पापकस्स जिगुच्छनवादो। जिगुच्छतीति जिगुच्छो, तब्भावो जेगुच्छं, अधिकं जेगुच्छं अधिजेगुच्छं, अतिविय पापजिगुच्छनं, तस्मिं अधिजेगुच्छे। कायदळहीबहुलं तपतीति तपो, अत्तकिलमथानुयोगवसेन पवत्तं वीरियं, तेन कायदळहीबहुलतानिमित्तस्स पापस्स जिगुच्छनं, विरज्जनम्पि तपोजिगुच्छाति आह "वीरियेन पापजिगुच्छा"ति । घासच्छादनसेनासनतण्हाविनोदनमुखेन अत्तस्नेहविरज्जनन्ति अत्थो। उपरि वुच्चमानेसु नानाकारेसु अचेलकादिवतेसु एकझं समादिन्नानं परिसोधनमेवेत्थ पारिपूरणं, न सब्बेसं अनवसेसतो समादानं तस्स असम्भवतोति आह "परिपुण्णाति परिसुद्धा"ति । परिसोधनञ्च नेसं सकसमयसिद्धेन नयेन पटिपज्जनमेव । विपरियायेन अपरिसुद्धता वेदितब्बा ।
५७. "एकं पहम्पि न कथेती"ति पठमं अत्तना पुच्छितपञ्हस्स अकथितत्ता वुत्तं ।
तपनिस्सितकोति अत्तकिलमथानुयोगसङ्घातं तपं निस्साय समादाय वत्तनको । सीहनादेति सीहनादसुत्तवण्णनायं । यस्मा तत्थ वित्थारितनयेन वेदितब्बानि, तस्मा तस्सा अत्थप्पकासनाय वुत्तनयेनपि वेदितब्बानि ।
उपक्किलेसवण्णना
५८. "सम्मा आदियती"ति वत्वा सम्मा आदियनञ्चस्स दळहग्गाहो एवाति आह "दळ्हं गण्हाती"ति। "सासनावचरेनापि दीपेतब्ब''न्ति वत्वा तं दस्सेतुं "एकच्चो ही"तिआदि वुत्तं, तेन धुतङ्गधरतामत्तेन अत्तमनता, परिपुण्णसङ्कप्पता सम्मापटिपत्तिया उपक्किलेसोति इममत्थं दस्सेति, न यथावुत्ततपसमादानधुतङ्गधरतानं सतिपि अनिय्यानिकत्ते सदिसतन्ति दट्ठब्बं ।
"दुविधस्सापीति 'अत्तमनो होति परिपुण्णसङ्कप्पो'ति च एवं उपक्किलेसभेदेन वुत्तस्स दुविधस्सापि तपस्सिनो''ति केचि । यस्मा पन अट्ठकथायं सासनिकवसेनापि अत्थो दीपितो, तस्मा बाहिरकस्स, सासनिकस्स चाति एवं दुविधस्सापि तपस्सिनोति अत्थो वेदितब्बो। तथा चेव हि उपरिपि अत्थवण्णनं वक्खतीति । एत्तावताति यदिदं “को अञ्जो मया सदिसो''ति एवं अतिमानस्स, अनिहितकिच्चस्सेव च "अलमेत्तावता''ति एवं अतिमानस्स च उप्पादनं, एत्तावता ।
16
.
Jain Education International
For Private & Personal Use Only
www.jainelibrary.org
