________________
निरयावलियासु
[३१
उकुरुडियाए उज्झाहि" । तए णं सा दासचेडी चेल्लणाए देवीए एवं वुत्ता समाणी करयल° जाव कट्ट चेल्लणाए देवीए एयमद्रं विणएणं पडिसुणेइ । २ तं दारगं करयलपुडेणं गिण्हइ । २ जेणेव असोगवणिया, तेणेव उवागच्छइ । २तं दारगं एगन्ते उकुरुडियाए उज्झाइ । तए णं तेणं दारगेणं एगन्ते उकुरुडियाए उज्झिएणं समाणेणं सा असोगवणिया उजोविया यावि होत्था ॥ ३१ ॥ __ तए णं से सेणिए राया इमीसे कहाए लद्धटे समाणे, जेणेव असोगवणिया तेणेव उवागच्छइ । २ तं दारगं एगन्ते उकुरुडियाए उज्झियं पासेइ । २ आसुरुत्ते जाव मिसिमिसेमाणे तं दारगं करयलपुडेणं गिण्हइ ।२ जेणेव चेल्लणा देवी, तेणेव उवागच्छइ । २ चेल्लणं देविं उच्चावयाहिं आओसणाहिं आओसइ।२ उच्चावयाहिं निभच्छणाहिं निभच्छेइ ।२ एवं उद्धसणाहिं उद्धंसेइ । २ एवं वयासी-"किस्स णं तुम मम पुत्तं एगन्ते उकुरुडियाए उज्झावेसि" त्ति कट्ठ चेल्लणं देविं उच्चावयसवहसाधियं करेइ । २ एवं वयासी-"तुमं णं, देवाणुप्पिए, एयं दारगं अणुपुवेणं सारक्खमाणी संगोवेमाणी संवड्डेहि " । तए णं सा चेल्लणा देवी सेणिएणं रन्ना एवं वुत्ता समाणी लजिया विलिया विड्डा करयलपरिग्गहियं सेणियस्स रन्नो विणएणं एयमढें पडिसुणेइ । २ तं दारगं अणुपुषेणं सारक्खमाणी संगोवेमाणी संवड्डे ॥ ३२॥
तए णं तस्स दारगस्स एगन्ते उकुरुडियाए उज्झिज्जमाणस्स अग्गङ्गुलिया कुक्कुडपिच्छेएणं दूमिया यावि होत्था, अभिक्खणं अभिक्खणं पूयं च सोणियं च अभिनिस्सावेइ । १ A उजोइया. २ A पिच्छिएणं.
