________________
१७४
भवभावना
संपुन्नससहरमुहा, पाउसगज्जंतमेहसमघोसा। सोमा ससि व्व सूरा, व सप्पहा कणयमिव रुइरा॥२९३॥ पाणितलाइसु ससिसूरचक्कसंखाइलक्खणोवेया। वज्जरिसहसंघयणा, समचउरंसा य संठाणा॥२९४॥ लायन्नरूवनिहिणो, दंसणसंजणियजणमणाणंदा। इय गुणनिहिणो होउं, पढमेच्चिय जोव्वणारंभे॥२९५॥ तह विहुरिज्जति खणेण कुट्ठक्खयपमुहभीमरोगेहि। जह होंति सोयणिज्जा, निवविक्कमरायतणुओ व्व।२९६॥ अन्ने उण सव्वंगं, गसिया जररक्खसीइ जायंति। रमणीण सज्जणाण य, हसणिज्जा सोअणिज्जा य॥२९७॥ इय विहवणयपराण वि, तारुण्णं पि हु विडंबणट्ठाणं। जे उण दारिद्दहया, अनीइमंताण ताणं तु॥२९८॥ परजुवइरमणपरदव्वहरणवहवेरकलहनिरयाणं। दुन्नयधणाण निच्चं, दुहाइं को वन्निउं तरइ ?॥२९९॥ नत्थि घरे मह दव्वं, विलसइ लोओ पयट्टइ छणो त्ति। डिंभाइ रुयंति तहा, हद्धी किं देमि घरिणीए ?॥३००॥ देंति न मह ढोयं पि हु, अत्तसमिद्धीइ गव्विया सयणा। सेसा वि हु धणिणो परिहवंति न हु देति अवयासं॥३०१॥ अज्ज घरे नत्थि घयं, तेल्लं लोणं वा इंधणं वत्थं। जाया व अज्ज तउणी, कल्ले किह होहिइ कुटुंबं ?॥३०२॥ वड्ढइ घरे कुमारी, बालो तणओ विढप्पइ न अत्थे। रोगबहुलं कुटुंबं, ओसहमोल्लाइयं नत्थि॥३०३॥ उक्कोया मह घरिणी, समागया पाहुणा बहू अज्ज। जिन्नं घरं च हट्टे, झरइ जलं गलइ सव्वं पि॥३०४॥ कलहकरी मह भज्जा, असंवुडो परियणो पहू विसमो। देसो अधारणिज्जो, एसो वच्चामि अन्नत्थ॥३०५॥ जलहिं पविसेमि महि, तरेमि धाउं धमेमि अहवा वि। विज्जं मंतं साहेमि देवयं वा वि अच्चेमि॥३०६॥
