________________
परिशिष्ट १
१६७
निग्गयजीहा पगलंतलोयणा दीहरच्छियग्गीवा। वाहिज्जंता महिसा, पेच्छसु दीणं पलोयंति॥१९५॥ विहियपमाया केवलसुहेसिणो चिन्नपरधणा विगुणा। वाहिज्जते महिसत्तणम्मि जह खुड्डओ विवसो॥१९६॥ काउं कुडुंबकज्जे, समुद्दवणिओ व्व विविहपावाई। मारेउं महिसत्ते, भुंजइ तेण वि कुटुंबेण॥१९७॥ उयरे उंटकरकं, पट्ठीए भरो गलम्मि कूवो य। उज्झं मुंचइ पोक्करइ, तहा वि वाहिज्जए करहो॥१९८॥ नासाएँ समं उठें, बंधेउं सेल्लियं च खिविऊण। लज्जूए अ खिविज्जइ, करहो विरसं रसंतोऽवि॥१९९॥ गिम्हम्मि मरुत्थलवालुयासु जलणोसिणासु खुप्पंतो। गरुयं पि हु वहइ भरं, करहो नियकम्मदोसेण॥२००॥ जिणमयमसद्दहंता, दंभपरा परधणेक्कलुद्धमणा। अंगारसरिपमुहा, लहंति करहत्तणं बहुसो॥२०१॥ जीवंतस्स वि उक्कित्तिउं छविं छिंदिऊण मंसाइं। खद्धाइं जं अणज्जेहिं पसुभवे किं न तं सरसि ?॥२०२॥ गलयं छेत्तूणं कत्तियाइ उल्लंबिऊण पाणेहि। घेत्तु तुह चम्ममंसं, अणंतसो विक्कियं तत्थ॥२०३॥ दिन्नो बलीए तह देवयाण विरसाइं बुब्बुयंतो वि। पाहुणयभोयणेसु य, कओ सि तो पोसिउं बहुसो॥२०४॥ धम्मच्छलेण केहिं, वि अन्नाणंधेहिं मंसगिद्धेहिं। निहओ निरुद्धसद्दो, गलयं वलिऊण जन्नेसु॥२०५॥ ऊरणयछगलगाई, निराउहा नाहवज्जिया दीणा। भुंजंति निग्घिणेहिं, दिज्जति बलीसु य न वग्घा॥२०६॥ पसुघाएणं नरगाइएसु आहिंडिऊण पसुजम्मे। महुविप्पो व्व हणिज्जइ, अणंतसो जन्नमाईसु॥२०७॥ रन्ने दवग्गिजालावलीहिं सव्वंगसंपलित्ताणं। हरिणाण ताण तह दुक्खियाण को होइ किर सरणं ?॥२०८॥
