________________
પ્રકાશકીય...
પૂજ્યશ્રી જંબૂવિજયજી મહારાજને એક અનોખી શ્રદ્ધાંજલી
પૂજ્યશ્રી જંબૂવિજયજી મહારાજના કાળધર્મ પછી પૂ. ગચ્છાધિપતિશ્રી જયઘોષસૂરિ મહારાજની પાવનનિશ્રામાં ભિવંડી મુકામે ગુણાનુવાદ સભાનું આયોજન થયું. એમાં અનેક ગુરુભગવંતોના પ્રવચનો થયા.
પ્રભાવક પ્રવચનકાર પૂ. પંન્યાસશ્રી મહાબોધિવિજયજી મહારાજે પોતાના પ્રવચન દરમિયાન વિહારમાં થતા ગુરુભગવંતોના અકસ્માતોમાં આપણો સંઘ પણ કેટલાક અંશે જવાબદાર છે એ અંગે ઘણી વાતો કરી. જેમાં એક વાત બહુ માર્મિક હતી.
પૂજ્યશ્રીએ કહ્યું : અમે ૨૫ સાધુ એક મોટા આચાર્ય ભગવંતની સાથે મુંબઇના એસ. વી. રોડ પર વિહાર કરતાં હોઇએ... એ જ વખતે સામેથી સ્થાનકવાસી સંપ્રદાયના બે સાધુ કે મહાસતી જો આવશે... તો ત્યારે અમારું મસ્તક શરમથી નીચે નમી જશે. કારણ કે એ બે નાના સાધુ કે સાધ્વી હશે તોય એમની સાથે વિહારમાં એકાદો શ્રાવક કે શ્રાવિકા હશે.. જ્યારે અમારી સાથે મોટા આચાર્ય હોવા છતાં સમ ખાવા પૂરતો એક શ્રાવક પણ નથી હોતો.
