________________
પસંદગી શેના પર ઉતારવી? પગરખાં અહિંસક હોય અને પગનાં માપને અનુરૂપ હોય તેટલું પર્યાપ્ત છે. પગરખાં ખરીદતી વખતે શ્રીમંત માણસ પગના ક્ષેત્રફળની સાથે ખિસ્સાનાં ક્ષેત્રફળને પણ ખ્યાલમાં રાખીને પસંદગી કરે છે ત્યારે સાદગી સ્થાનભ્રષ્ટ થાય છે. બિનજરૂરી કે અનિવાર્ય સિવાય કોઈ ટેલિફોન નહિ કરવાનો સંકલ્પ કરનાર વ્યક્તિ કેટલા બધા પૈસાની બચત કરે ? કેટલી બધી વિરાધનાથી બચે? અને, સાદગીના પંથ ઉપર બે ડગલાં મંડાય, તે વધારામાં.
એક વર્ષમાં કપડાંની નવી બેથી વધુ જોડી નહિ વસાવવાનો નિર્ણય થાય તો પણ કબાટમાં ગિરદી કેટલી બધી ઓછી થાય? નિર્લજ્જતાને નિર્વસ્ત્રતાની જેમ અતિવસ્ત્રતા સાથે પણ સાંકળવામાં આવેતો કેટલું સારું! પંદર મિનિટની બસની મુસાફરી માટે પચ્ચીસ મિનિટ ક્યુમાં ઊભા રહેતા આદમીને પ્રમાદી કહેવો કે ઉન્માદી ? પંદર મિનિટથી ઓછા અંતરે જવા માટે વાહનનો ઉપયોગ નહિ કરવાનો સંકલ્પ ખડતલપણું પેદા કરે, સુખશીલતા ટાળે, વિરાધનાથી બચાવે, સ્વાશ્રયનો ગુણ વિકસાવે અને સાદગીને પ્રતિષ્ઠિત કરાવે. સંતોષ અને સાદગીને જીવનસ્થ કરવા માટે ચૌદ નિયમની ધારણા એ સચોટ શાસ્ત્રોક્ત પ્રયોગ છે. સંતોષની વિભાવનાને આઈડીઓલોજીના સ્તર પરથી રીઆલિટિના સ્તર ઉપર સહજતાથી લાવી મૂકવાનો આવો સુચારુ આચારમાર્ગ દર્શાવીને જૈન દર્શને કમાલ કરી છે.
દરેક શ્રીમંત આવી કોઈ નિયમાવલી નક્કી કરે તો સાદગીના મહિમાથી પોતે અને બીજાઓ પણ ભાવિત–પ્રભાવિત બને.
ત્યાજ્ય વસ્તુઓ સાવ છોડી ન જ શકાય તો પણ, * ઘરમાં એકથી વધુ ટી.વી. નહિ. * આખા પરિવાર દીઠ એકથી વધુ વિહિકલ નહિ. * એકથી વધુ છાપું નહિ. * એકથી વધુ શાક નહિ. * એકથી વધુ ચપ્પલની જોડ નહિ. * એક દિવસમાં એકથી વધુ પ્રકારનું ફૂટ નહિ.
