________________
મનની વાત
રત્ન જડેલા,
સોનેરી ચશ્મા લાવ્યો,
આંખના ભોગે.
સત્તર અક્ષરો દ્વારા હૃદયને ચોંટ લગાડતા આ હાઈકુમાં આજના માણસની દશાનું યથાર્થ પ્રતિબિંબ ઝિલાયું છે.
વૈશ્વિક, કૌટુંબિક અને આત્મિક સમસ્યાઓની નાગચૂડમાં માણસ ફસાયો છે. બધે અછતની ભરમાર છે, મોંઘવારી બેસુમાર છે, ઈચ્છાઓ અપરંપાર છે.
આવક અને સમાધિ તૂટતા જાય છે. જરૂરિયાત અને સંકલેશ વધતા જાય છે. સ્વરૂપરમણતાના સુખની વાત તો દૂર રહી ચિત્ત સમાધિ પણ દુષ્કર બની ગઈ છે.
કપરા કાળની અસર હેઠળ ભલભલા ધર્મી આત્માઓ પણ આવી ગયા છે. સર્વજ્ઞ ભગવંતોનાં હિતકારી વચનોનાં અતિક્રમણનું આ પરિણામ છે. આજના સમયની માંગ રૂપે કંઈક માર્ગદર્શન આપવાના હેતુથી પ્રસ્તુત પ્રયાસ કર્યો છે. જનમાનસમાં પ્રભુશાસનના કલ્યાણકારી સિદ્ધાંતો પ્રત્યેનો અહોભાવ વધારવામાં અને અનેકની જીવનસમાધિમાં નિમિત્ત બનવાનું સદ્ભાગ્ય મળે તે શુભાશયથી જ.
પ્રસ્તુત લખાણમાં પરમ પવિત્ર શ્રી જિનાજ્ઞા વિરુદ્ધ કાંઈ પણ લખાયું હોય તો ત્રિવિધે ત્રિવિધે મિચ્છામિ દુક્કડમ્.
–મુનિ ઉદયવલ્લભવિજય
