________________
સ્વામી વિવેકાનંદ માત્ર ૩૯ વર્ષ જીવ્યા હતા... ઈશુખ્રિસ્ત ૩૫ વર્ષ જીવ્યા હતા...
તા.૧૨/૪/૧૯૬૧ ના દિવસે ૧૦૮ મિનિટ સુધી અવકાશયાનમાં પૃથ્વીની પરિક્કમા કરી ત્યારે યુરી ગેગરીનની ઉંમર ૨૧ વર્ષની હતી અને ૩૪ વર્ષની ઉંમરે તેનું મૃત્યુ થયું હતું...
વિવિધ ક્ષેત્રોમાં જ્વલંત સફળતા હાંસલ કરીને વિશ્વપ્રસિદ્ધ બનનાર આ વ્યક્તિઓએ તે તે ક્ષેત્રની પોતાની કારકિર્દિનો પ્રારંભ શું મોટા થયા પછી કર્યો હશે? અને, મોટા થયા પછી કર્યો હોત તો આવી સિદ્ધિઓ પ્રાપ્ત કરી શકત?
લેખકશ્રીએ બાળદીક્ષાનો મિથ્યા-વિરોધ કરનારને બાળકોના હિત માટે ખરેખર વિરોધ કરવા જેવા બાલશિક્ષણ, બાલમજૂરી, બાળકો દ્વારા થતા ગુન્હા, બાલશોષણ વગેરે ક્ષેત્રોનું દિશાસૂચન કરીને ગર્ભિત રીતે શંકાની સોય તાકી છે કે, બાળદીક્ષાના વિરોધીઓને વાસ્તવમાં બાળકોના હિત અને કલ્યાણ સાથે કોઈ મતલબ છે ખરો?
બંધારણ, જુવેનાઇલ જસ્ટિસ એક્ટ જેવા કાયદા, ચાઈલ્ડ પોલિસી, નેશનલ ચાર્ટર કે CRC જેવા વિરોધીઓના શસ્ત્રોને લેખકશ્રીએ સચોટ રીતે બુઠ્ઠાં પુરવાર કર્યા છે. અનેક સચોટ યુક્તિઓથી બાળદીક્ષાનું સમર્થન ક્યું છે. બાળકોને સમજણ વગરના સમજનાર બાળદીક્ષાના વિરોધીઓનો વિરોધ કેટલો સમજણ વગરનો છે તેનું ખૂબ સરસ રીતે પ્રતિપાદન કર્યું છે, સાથે સાથે બાળદીક્ષા સંપૂર્ણ શાસ્ત્રીય છે તે પણ અનેક શાસ્ત્રોના ઉલ્લેખ ટાંકીને સિદ્ધ કર્યું છે.
