________________
ભગવાન ઈશુ સત્ય એ માનવજીવનનાં રોજેરોજનાં વ્યવહારમૂલ્યો બનવા જોઈએ. પૃથ્વીએ ઈશુને ધારણ કર્યાનું સૌભાગ્ય ત્યારે જ સિદ્ધ થાય, જ્યારે પૃથ્વી પરથી યુદ્ધ' નામની ચીજ નામશેષ થાય. ઈશુએ પોતાના જીવન દ્વારા પડકારો ઊભા કર્યા છે, એને ઝીલવા માટે માનવસમાજે કટિબદ્ધ થવું એ જ તરણોપાય છે.
૧૦. ઈશુવાણી
ઈશુનું સમસ્ત ચરિત્ર જેટલું મનમોહક અને ચિત્તાકર્ષક છે, એટલો જ જાદુ એમની વાણીમાં ભરેલો છે. ઈશુની જાદુભરી વાણી સાંભળવા લોકો તરસતા, એની વાણી સાંભળી એનું કાસળ કાઢવા ઈછતા લોકો પણ કહેતા કે, ‘‘આવી રીતે કોઈ માણસને બોલતો અમે સાંભળ્યો નથી.''
એમની વાણી હૈયાસોંસરવી ઊતરી જતી અને હૃદયમાં ઝળાંઝળાં પ્રકાશ પાથરી દેતી હતી. એક વખતે રસ્તે ચાલ્યા જનારા સાથે એમણે વાતો કરવા માંડી. છૂટા પડ્યા પછી એક માણસ બીજાને કહે છે, “એ બોલતા હતા ત્યારે આપણા અંતરમાં પ્રકાશનાં કિરણો ફેલાતાં હોય તેવું નહોતું લાગતું?'' આમ ઈશુની વાણી માનવીને એના ઠેઠના મૂળ સ્થાન સુધી પહોંચાડી દેતી અને એને આખો ને આખો હલબલાવી મૂકતી. એની વાણીમાં સત્ય ઝળહળતું, આશા જીવતી, અમરત્વ રણકતું, પ્રેમ છલકાતો, જીવન સંચરતું. શબ્દોનો તો જાણે એ જાદુગર હતો ! ““સાક્ષાત્ સનાતન શબ્દ'' જાણે ઈશુ બનીને સાકાર થયો હતો.
