________________
કોનો દોષ
પાપમાં ડૂબેલાને પુણ્યશાળીનો સમાગમ આનન્દ ન આપે એમાં પુણ્યશાળીનો શો દોષ? અરુણના આગમનથી જેવો આનન્દ કમળને થાય તેવો આનન્દ ઘુવડને ન થાય એમાં અરુણનો શો દોષ?
સાધકની દૃષ્ટિ
પ્રલોભનનાં લપસણા માર્ગે સરી પડતા મનને સજ્જન મિત્ર, સદુપદેશ અને આત્મ જાગૃતિની એટલી જ જરૂર છે કે જેટલી અંધારી રાતે અટવીમાં ભૂલા પડેલા પ્રવાસીને દીપક ધરનાર ભોમિયાની.
ભય .
હ્રદયમાં ભયની ઉધઈ લાગી ગઇ તો શક્તિઓ કુંઠિત બની જશે. શક્તિઓને વિકસાવવા અને નિર્ભય થવા દૂરં ભાગવા કરતા એ વસ્તુઓનો પરિચય કરીએ, એનું તત્ત્વ જાણીએ, આ સમજ જ ભયને ભય પમાડશે.
જીવન સૌરભ ૨૩
