________________
દેવદ્રવ્ય અને જિનપૂજા
८
છે કે એની કૃપણતાને તોડશે. એને પ્રભુભક્તિ કરતો જ અટકાવી દેવામાં આવે તો તો કૃપણતા વગેરેને તોડનાર એક પ્રબળ સાધનાથી એને વંચિત જ કરી દેવાનું થાય. ગીતાર્થ શાસ્ત્રકારોને આવું કોઈ રીતે માન્ય હોય ન શકે.
શંકા- પણ પરદ્રવ્યથી ભક્તિ કરે એને ભાવોલ્લાસ શું આવે ?
સમાધાન-પરદ્રવ્યથી ઉલ્લાસ ન જ આવે એવો કોઈ કાયદો નથી. રાજાની બે બાજુ ચામર ઢાળનાર વ્યક્તિ કાંઈ સ્વદ્રવ્યના ચામર નથી ઢાળતા. રાજાના જ ચામર લઈને રાજાની બન્ને બાજુએ ઢાળવા છતાં પણ રાજા પ્રત્યેનો આદર પ્રીતિ-ભાવોલ્લાસ ન જ હોય એવું નથી. ક્યારેક તો એવી પ્રીતિ પેદા થાય કે અવસરે રાજા માટે જાનફેસાની પણ કરી દે.
શ્રી મૂલશુદ્ધિ પ્રકરણમાં દ્રોણકાખ્યાનમાં આવે છે કે ચાર મિત્રો પોતાના ભોજનદ્રવ્ય વડે પોતાના નોકર દ્રોણકને સાધુઓને ભિક્ષાદાન આપવા જણાવે છે. ત્યારે દ્રોણક અત્યંત ભક્તિ-શ્રદ્ધા ભરપૂર દિલે રોમાંચિત થઈને વ્હોરાવે છે જેના પ્રભાવે એ કુરુદેશમાં કુરુચંદ્ર નામે રાજકુમાર થઈ ક્રમશઃ મોક્ષે જશે.
પોતાના ખર્ચે તીર્થયાત્રા કરી ન શકનારા શ્રાવકને અન્ય કોઈ સંપન્ન શ્રાવક યાત્રા કરાવે તો નિર્ધન શ્રાવક ખૂબ જ હર્ષથી તીર્થયાત્રા કરે છે. એમ કોઈ સંપન્ન શ્રાવક ગિરિરાજ પર દાદાની પૂજાનું ઘી બોલીને નિર્ધન શ્રાવકને પ્રથમ પૂજા કરવાનો લાભ આપે ત્યારે એના પ્રભુભક્તિના ભાવોલ્લાસમાં ખૂબ ઉછાળા આવે છે એવું જોવા શું નથી મળતું ? અન્યના દ્રવ્યથી ભક્તિ વગેરે કરવામાં ભાવોલ્લાસ ન જ પ્રગટે અને તેથી કશું ફળ ન જ મળે એવો કાયદો હોત તો છ'રી પાલિત સંઘ વગેરે અનુષ્ઠાનો