________________ सीसम्मि पक्खिवंतो भण्णइ तं गुरुगुणेहिं वड्डाहि / एवं तु तिण्णि वारा उवविसई तओ गुरू पच्छा // 1344 // सेसं जह सामइए दिसाइअणुजाणणाणिमित्तं तु / णवरं इह उस्सग्गो उवविसइ तओ गुरुसमीवे // 1345 // दिति अ तो वंदणयं सीसाइ तओ गुरु वि अणुसट्ठि। दोण्ह वि करेइ तइ जह अण्णो वि अ बुज्झई कोई // 1346 // उत्तममिअं पयं जिणवरेहिं लोगुत्तमेहिं पण्णत्तं / उत्तमफलसंजणयं उत्तमजणसेविअं लोए // 1347 // धण्णाण णिवेसिज्जइ धण्णा गच्छंति पारमेअस्स। गंतुं इमस्स पारं पारं वच्चंति दुक्खाणं // 1348 // संपाविऊण परमे णांणाई दुहिअतायणसमत्थे / भवभयभीआण दढं ताणं जो कुणइ सो धण्णो // 1349 // अण्णाणवाहिगहिआ जइ वि न सम्म इहाउरा होंति। तह वि पुण भावविज्जा तेसिं अवणिति तं वाहि // 1350 // ता तंऽसि भावविज्जो भवदुक्खनिबीडिया तुहं एए। हंदि सरणं पवण्णा मोएअव्वा पयत्तेणं // 1351 // मोएइ अप्पमत्तो परहिअकरणम्मि णिच्चमुज्जत्तो। भावसोक्खापडिबद्धो पडिबद्धो मोक्खसोक्खम्मि // 1352 // ता एरिसो चिअ तुमं तह वि अ भणिओऽसिं समयणीईए। णिअयावत्थासरिसं भवया णिच् पि कायव्वं // 1353 // तुब्भेहि पि न एसो संसाराडविमहाकडिल्लम्मि। सिद्धिपुरसत्थवाहो जत्तेण खणं पि मोत्तव्वो // 1354 // ण य पडिकूलेअव्वं वयणं एअस्स नाणरासिस्स। . एवं गिहवासचाओ जं सफलो होइ तुम्हाणं // 1355 // 113
