________________
पण्णवणासुतं
केवलणाणुवउत्ता, जाणंती सव्वभावगुण-भावे । पासंति सव्वतो खलु, केवल दिट्ठीहिणंताहिं' ॥१३।। न वि अत्थि माणुसाणं, तं सोक्खं न वि य सव्वदेवाणं । जं सिद्धाणं सोक्खं, अव्वाबाहं उवगयाणं ॥१४॥ 'सुरगणसुहं समत्तं", सव्वद्धापिंडितं अणंतगुणं । 'ण वि पावे" मुत्तिसुहं, 'णंताहि वि" वग्गवग्गूहिं ॥१५॥ सिद्धस्स सुहो रासी, सव्वद्धापिंडितो जइ हवेज्जा । सोणंतवग्गभइतो, सव्वागासे ण माएज्जा ॥१६।। जह णाम कोइ मेच्छो, णगरगुणे बहुविहे वियाणंतो । न चएइ परिकहेउं, उवमाए तहिं असंतीए ॥१७॥ इय सिद्धाणं सोक्खं, अणोवमं णत्थि तस्स ओवम्म । किंचि विसेसेणेत्तो, सारिक्खमिणं' सुणह वोच्छं ॥१८॥ जह सव्वकामगुणितं, पुरिसो भोत्तूण भोयणं कोइ । तण्हा-छहाविमुक्को, अच्छेज्ज जहा अमिय तित्तो॥१६॥ इय सव्वकालतित्ता, अतुलं णेव्वाणमुवगया सिद्धा । सासयमव्वाबाहं, चिट्ठति सुही सुहं पत्ता ॥२०॥ सिद्धत्ति य बुद्धत्ति य, पारगतत्ति य परंपरगतत्ति । उम्मक्ककम्मकवया, अजरा अमरा असंगा य॥२१॥ णिच्छिण्णसव्वदुक्खा, जाति-जरा-मरणबंधणविमुक्का । अव्वाबाहं सोक्खं, अणुहोंती' सासयं सिद्धा' ॥२२॥
१. °दिट्ठीहिणंताहिं (क,ख,घ); दिट्ठीहणंताहिं
(पु)। २. जं देवाण सोक्खं (ओ० स० १९५१४)। ३. ण य पावइ (ओ० सू० १६५।१४) । ४. गंताहिं (ग); णंताहिं वि (पु)। ५. सारक्खमिणं (घ); भोवम्ममिणं (ओ० सू०
१६५।१७)। ६. अणुहंती (क,ख) : अणुहोति (ग)। ७. अतोग्रे औपपातिके (सू० १६५) एषा गाथा
दृश्यतेअतुलसुहसागरगया, अव्वाबाहं अणोवमं पत्ता। सव्वमणागयमद्धं, चिठ्ठति सुही सुहं पत्ता ॥१॥
Jain Education International
For Private & Personal Use Only
www.jainelibrary.org
