Page Text
________________
(१४) जीवाजीवाभिगम (३) पडिवत्ति (च) दीवसमुद्द [ ७१ ]
णवरि बहुमज्झदेसे पेच्छाघरमंडवाणं अक्खाडगा मणिपेढियाओ अद्धजोयणप्पमाणाओ सीहासणा अपरिवारा जाव दामा थमाई चउद्दिसि तहेव णवरि सोलसजोयणप्पमाणा सातिरेगाई सोलस जोयणाई उच्चा सेसं तहेव जाव जिणपडिमा, चेइयरूक्खा तहेव चउद्दिसिं तं चेव पमाणं जहा विजयाए रायहाणीए णवरि मणिपेढयाओ सोलसजोयणप्पमाणाओ, तेसिं णं चेइयरूक्खाणं चउद्दिसिं चत्तारि मणिपेढियाओ अट्टजोयणविक्खंभाओ चउजोयणबाहल्लाओ महिंदज्झया चउसट्ठिजोयणुच्चा जोयणोव्वेधा जोयणविक्खंभा सेसं तं चेव, एवं चउद्दिसिं चत्तारि णंदापुक्खरिणीओ णवरि खोयरसपडिपुण्णाओ जोयणसतं आयामेण पन्नासं जोयणाइं विक्खंभेणं पण्णासं जोयणाई उव्वेधेणं सेसं तं चेव, मणोगुलियाणं गोमाणसीण य अडयालीसं २ सहस्साइं पुरच्छिमेण सोलस पच्चत्थिमेणवि सोलस दाहिणेण अट्ठ उत्तरेणवि अट्ठ साहस्सीओ तहेव सेसं उल्लोया भूमिभागा जाव बहुमज्झदेसभागे, मणिपेढिया सोलस जोयणा आयामविक्खंभेणं अट्ठ जोयणाई बाहल्लेणं तारिसं मणिपीढियाणं उप्पिं देवच्छंदगा सोलस जोयणाई आयामविक्खंभेणं सातिरेगांइं सोलस जोयणाई उड्ढउच्चत्तेणं सव्वरयण० अट्ठसय जिणपडिमाणं सव्वो सो चेव गमो जहेव वेमाणियसिद्धायतणस्स, तत्थ णं जे से पुरच्छिमिल्ले अंजणपव्वते तस्स णं चउद्दिसिं चत्तारि णंदाओ पुक्खरिणीओ पं० तं०-दुत्तरा य णंदा आणंदा णंदिवद्धणा (नंदिसेणा अमोघा य, गोधूमा य सुदंसणा ), ताओ णंदापुक्खरिणीओ एगमेगं जोयणसतसहस्सं आयामविक्खंभेणं दस जोयणाई उव्वेहेणं अच्छाओ सण्हाओ पत्तेयं २ पउमवरवेदिया० पत्तेयं २ वणसंडपरिक्खित्ता तत्थ २ जाव सोवाणपडिरूवगा तोरणा, तासिं णं पुक्खारिणीणं बहुमज्झदेसभाए (तासिंणं पुक्खरिणीणं चउद्दिसिं चत्तारि वणसंडा पं० तं० पुरच्छिमेणं दाहिणेणं पच्चत्थिमेणं उत्तरेणं- 'पुव्वेण असोगवणं दाहिणतो होइ सत्तपण्णवणं । अवरेण चंपगवणं चूयवणं उत्तरे पासे || १॥ तासिं पा०) पत्तेयं २ दहिमुहपव्वया पं०, ते णं दहिमुहपव्वया चउसट्टी जोयणसहस्साइं उड्ढउच्चत्तेणं एगं जोयणसहस्सं वेणं सव्वत्थसमा पल्लगसंठाणसंठिता दस जोयणसहस्साइं विक्खंभेणं एक्कतीसं जोयणसहस्साइं छच्च तेवीसे जोयणसए परिक्खेवेणं पं० सव्वरयणामया अच्छा जाव पडिरूवा तहा पत्तेयं २ पउमवरवेइया० वणसंडवण्णओ जाव आसयंति सयंति० सिद्धायतणं तं चेव पमाणं अंजणपव्वएस सच्चेव वत्तव्वया णिरवसेसा भाणियव्वा जाव उप्पिं अट्ठट्ठमंगलगा, तत्थ णं जे से दक्खिणिल्ले अंजणगपव्वते तस्स णं चउद्दिसिं चत्तारि णंदाओ पुक्खरिणीओ पं० तं० भद्दा य विसाला य कुमुया पुंडरीगिणी, (नन्दुत्तरा य नंदा, आनन्दा नन्दिवड्ढणा) तं चैव पमाणं ते चेव दहिमुहा पव्वया तं चेव पमाणं जाव सिद्धायतणा, तत्थ णं जे से पच्चत्थिमिल्ले अंजणगपव्वए तस्स णं चउदिसिं चत्तारि णंदा पुक्खरिणीओ पं० तं० णंदिसेणा अमोहा य, गोत्थूमा य सुदंसणा (भद्दा विसाला कुमुदा पुंडरीकिणी) तं चैव सव्वं भाणियव्वं जाव सिद्धायतणा, तत्थ णं जे से उत्तरिल्ले अंजणगपव्वते तस्स णं चउद्दिसिं चत्तारि णंदापुक्खरिणीओ पं० तं०- विजया वेजयंती जयंती अपराजिया, सेसं तव जाव सिद्धायतणा सव्वा सा चिय वण्णणा णातव्वा, तत्थ णं बहवे भवणवइवाणमंतरजोतिसियवेमाणिया देवा चाउम्मासियपाडिवएसु संवच्छरिएसु वा अण्णेसु बहूसु जिणजम्मणणिक्खमणणाणुप्पत्तिप-रिणिव्वाणमादिएसु य देवकज्जेसु य देवसमुदएसु य देवसमितीसु य देवसमवाएसु य देवपओयणेसु य एतओ सहिता समुवागता समाणा पमुदितपक्की लिया अट्ठाहितारूवाओ महामहिमाओ करेमाणा पालेमाणा सुहंसुहेणं विहरंति, कइलासहरिवाणा य तत्थ दुवे देवा महिड्ढीया जाव पलिओवमट्ठितीया परिवसंति, से एतेणट्टेणं गो० ! जाव णिच्चा, जोतिसं संखेज्जं । १८४ | मंदिस्सरवरण्णं दीवं णंदीसरोदे णामं समुद्दे वट्टे वलयागारसंठाणसंठिते जाव सव्वं तहेव अट्ठो जो खोदोदगस्स जाव सुमणसोमणसभद्दा य एत्थ दो देवा महिड्ढीया जाव परिवसंति सेसं तहेव जाव तारग्गं । १८५ । णंदीसरोदं समुदं अरूणे णामं दीवे वट्टे वलयागार जाव संपरिक्खिवित्ताणं चिट्ठति, अरूणे णं भंते! दीवे किं समचक्कवालसंठिते विसमचक्कवालसंठिए ?, गो० ! समचक्क० नो विसमचक्क०, केवतियं चक्कवालवि० १, संखेज्जाई जोयणसयसहस्साइं चक्कवालविक्खंभेणं संखेज्जाई जोयणसयसहस्साइं परिक्खेवेणं पं०, पउमवरवणसंडदारा दारंतरा य तहेव संखेज्जाइं जोयणसतसहस्साइं दारंतरं जाव अट्ठो, वावीओ खोतोदगपडिहत्थाओ उप्पातपव्वयका सव्ववइरामया अच्छा०,
| SR No. | 003264 |
| Book Title | Agam 14 Upang 03 Jivabhigam Sutra Shwetambar Agam Guna Manjusha |
| Original Sutra Author | N/A |
| Author | Gunsagarsuri |
| Publisher | Jina Goyam Guna Sarvoday Trust Mumbai |
| Publication Year | 1999 |
| Total Pages | 102 |
| Language | Prakrit |
| Classification | Book_Devnagari, Agam, Canon, & agam_jivajivabhigam |
| File Size | 10 MB |