Page Text
________________
(१८) जंबूदीवपत्रत्ति वक्खारो ३
KKKKKKKK¶¶¶¶¶¶¶
उप्पण्णे खलु भो देवाणुप्पिआ ! जंबुद्दीवे दीवे भरहे वासे भरहे राया चाउरंतचक्कवट्टी तं जीअमेअ तीअपच्चुप्पण्णमणागयाणं विज्जाहरराईणं चक्वट्टीणं उवत्थाणिअं करेत्तए, तं गच्छामो णं देवाणुप्पिआ ! अम्हेवि भरहस्स रण्णो उवत्थाणिअं करेमो इतिकट्टु विणमी णाऊणं चक्कवट्टिं दिव्वाए मईए चोइअमई माणुम्माणप्पमाणजुत्तं तेयंसिं रूवलक्खणजुत्तं ठिअजुव्वणकेसं ठिअणहं सव्वरोगणासणिं बलकरिं इच्छिअसीउण्हफासजुत्तं- 'तिसु तणुअं तिसु तंबं तिवलीगं तिउण्णयं तिगंभीरं । तिसु कालं तिसु से तिआयतं तिसु य विच्छिण्णं ||२७|| समसरीरं भरहे वासंमि सव्वमहिलप्पहाणं सुंदरथपाजघणवदणकरचलणणयणसिरसिजदसणजणहिअयरमणमणहरिं सिंगारागार जाव जुत्तोवयारकुसलं अमरवहूणं सुरूवं रूवेणं अणुहरंती सुभद्दं जोव्वणे वट्टमाणिं इत्थीरयणं णमी य रयणाणि य कडगाणि य तुडिआणि य गेण्हइ त्ता ताए उक्किट्ठाए तुरिआए जाव उद्भूआए विज्जाहरगईए जेणेव भरहे राया तेणेव उवागच्छंति त्ता अंतलिक्खपडिवण्णा सखिखिणीयाई जाव विजएणं वद्धावेति त्ता एवं वयासी- अभिजिए णं देवाणुप्पिया ! जाव अम्हे देवाणुप्पियाणं आणत्तिकिंकरा इतिकट्टु तं पडिच्छंतु णं देवाणुप्पिया ! अम्हं इमं जाव विणमी इत्थीरयणं णमी रयणाई समप्पेति, तए णं से भरहे राया जाव पडिविसज्जेइ त्ता पोसहसालाओ पडिणिक्खमइ त्ता मज्जणघरं अणुपविसर ता भोअणमंडवे जाव नमिविनमीणं विज्जाहरराईणं अट्ठाहिअमहामहिमा, तए णं से दिव्वे चक्करयणे आउहघरसालाओ पडिणिक्खमइ जाव उत्तरपुरत्थिमं दिसिं गंगादेवीभवणाभिमुंहे पयाए यावि होत्था, सच्चेव सव्वा सिंधुवत्तव्वया जाव नवरं कुंभट्ठसहस्सं रयणचित्तं णाणामणिकणगरयणभत्तिचित्ताणि य दुवे कणगसीहासणाई सेसं तं चेव जाव महिमा । ६४ । तए णं से दिव्वे चक्करयणे गंगाए देवीए अठ्ठाहियाए महा जाव आउहघरसालाओ पडिणिक्खमइ त्ता जाव गंगाए महाणईए पच्चत्थिमिल्लेणं कूलेणं दाहिणदिसिं खंडप्पवायगुहाभिमुहे पयाए आवि होत्था, तते णं से भरहे राया जाव जेणेव खंडप्पवायगुहा तेणेव उवागच्छइ त्ता सव्वा कयमालकवत्तव्वया अव्वा, वरि णट्टमालगे देवे, पीतिदाणं से आलंकारिअभंड कडगाणि य सेसं सव्वं तहेव जाव अट्ठाहिआ महामहिमा, तए णं से भरहे राया णट्टमालगस्स देवस्स अट्ठाहिआए म० णिव्वत्ताए समाणीए सुसेणं सेणावई सद्दावेइ त्ता जाव सिंधुगमो णेअव्वो जाव गंगाए महाणईए पुरत्थिमिल्लं णिक्खुडं सगंगासागरगिरिमेरागं समविसमणिक्खुडाणि य ओअवेइ त्ता अग्गाणि वराणि रयणाणि पडिच्छइ त्ता जेणेव गंगा महाणई तेणेव उवागच्छइ त्ता दोच्चंपि सक्खंधावारबले गंगामहाण विमलजलतुंगवीइं णावाभूएणं चम्मरयणेणं उत्तरइ त्ता जेणेव भरहस्स रण्णो विजयखंधावारणिवेसे जेणेव बाहिरिआ उवट्ठाणसाला तेणेव उवागच्छइ त्ता आभिसेक्काओ हत्थरयणाओ पच्चोरूहइ ता अग्गाई वराई रयणाइं गहाय जेणेव भरहे राया तेणेव उवागच्छइ त्ता करयलपरिग्गहिअं जाव अंजलि कट्टु भरहं रायं जएणं विजएणं वद्वावेइ त्ता अग्गाइं वराई रयणाई उवणेइ, तए णं से भरहे राया सुसेणस्स सेणावइस्स अग्गाई वराई रयणाई पडिच्छइ त्ता सुसेणं सेणावई सक्कारेइं सम्माणेइ ता पडिविसज्नेइ, तए णं से सुसेणे सेणावई भरहस्स रण्णो सेसंपि तहेव जाव विहरइ, तए णं से भरहे राया अण्णया कयाई सुसेणं सेणावइरयणं सद्दावेइ त्ता एवं वयासी-गच्छ णं भो देवाणुप्पिआ ! खंडगप्पवायगुहाए उत्तरिल्लस्स दुवारस्स कवाडे विहाडेहि त्ता जहा तिमिस्सगुहाए तहा भाणिअव्वं जाव पिअं भे भवउ सेसं तव जाव भरहो तिमिस्सगुहाए उत्तरिल्लेणं दुवारेणं अईइ ससिव्व मेहंधयारनिवहं, तहेव पविसंतो मंडलाई आलिहइ, तीसे णं खंडगप्पवायगुहाए बहुमज्झदेसभाए जाव उम्मग्गणिमग्गजलाओ णामं दुवे महाणईओ तहेव णवरं पच्चत्थिमिल्लाओ कडगाओ पवूढाओ समाणीओ पुरत्थिमेणं गंगं महाणई समप्पेति, सेसं तहेव णवरिं पच्चत्थिमिल्लेणं कूलेणं गंगाए संकमवत्तव्वया तहेव, तए णं खंडगप्पवायगुहाए दाहिणिल्लस्स दुवारस्स कवाडा सयमेव महया २ कोंचारवं करेमाणा २ सरसरसरस्स सगाई ठाणाई पच्चोसक्कित्था, तए णं से भरहे राया चक्करयणदेसियमग्गे जाव खंडगप्पवायगुहाओ दक्खिणिल्लेणं दारेणं णीणेइ ससिव्व मेधयारनिवहाओ | ६५| तए णं से भरहे राया गंगाए महाणईए पच्चत्थिमिल्ले कूले दुवालसजोअणायामं णवजोअणविच्छिण्णं जाव विजयक्खंधावारणिवेस करेइ, अवसिद्धं तं चेव जा निहिरयणाणं अट्ठमभत्तं पगिण्हइ, तए णं से भरहे राया पोसहसालाए जाव णिहिरयणे मणसीकरेमाणे २ चिट्ठइ, तस्स य अपरिमिअरत्तरयणा धुअमक्खयमव्वया सदेवा लोकोपचयंकरा उवगया णव णिहिओ लोगविस्सुअजसा, तं०- 'नेसप्पे पंडुअए पिंगलए सव्वरयण महपउमे। काले अ महाकाले माणवगे महानिही संखे फफफफफफफ श्री आगमगुणमंजूषा - १२११०
[२९]
| SR No. | 002601 |
| Book Title | Agam Guna Manjusha |
| Original Sutra Author | N/A |
| Author | Gunsagarsuri |
| Publisher | Jina Goyam Guna Sarvoday Trust Mumbai |
| Publication Year | 1999 |
| Total Pages | 1868 |
| Language | Prakrit, Gujarati, Hindi, English |
| Classification | Book_Devnagari, Agam, & Canon |
| File Size | 85 MB |