________________
धनसेनकहा
४८५
धणसेणो निय नयरे, पविसेइ तुरयमारूढो ।। १२३४ ॥ दीणाइयाण दाणं, वियरंतो तह जयम्मि पयडंतो ।। नियजणयनाम गोत्ते, नियम्मि भवणम्मि संपत्तो ॥ १२३५ ।। सिरियादेवीं पणमइ, पावइ एयाइ परममासीसं ।। तह कुणइ वेणिमोक्खं, अणंगसेणाए सयमेव ॥ १२३६ ।। न्हाण-विलेवण-भोयणपमुहं अणुहवइ मित्तसंजुत्तो । संमाणइ निय सयणे, अत्थि जणं कुणइ सकयत्थं ॥ १२३७ ।। अइ निवडसि णेहाए, अणंगसेणाए गाढमणुरत्तो ।। तियसाण वि मणहरणं, विसयसुहं भुंजए निच्चं ॥ १२३८ ॥ अह सिरिसेणप्पमुहा, अणंगसेणाए नंदणा जाया ।। अकलंकियसीलाए, तहेव पियदंसणाए य ।। १२३९ ।। जाया तणया कमसो, नयनिहिणो विजियदंसणाईया ॥ तेसु समप्पियभारो, तिवग्गमवि साहए एसो ॥ १२४० ॥ उज्जाणे संपत्तं, सयंपभं नाम केवलिं सोउं ।। वच्चइ अणंगसेणा, संजुत्तो तस्स नमणत्थं ॥ १२४१ ।। तेणं नमंसिऊणं, निययं जम्मंतरं मुणी पुट्ठो ।। साहइ सुमित्तजम्मं सव्वं आमूलपज्जंतं ॥ १२४२ ।। भणिओ मुणिणा तुमए, दाणं देतेण खंडिओ भावो । जं तइया तो जाया, एत्थ भवे खंडिया लच्छी ॥ १२४३ ।। भावेण भुवणमित्तो, पारणयं कारिओ अखंडेण ।। जं तेण तुमं जाओ, सामी बहुरयणकोडीणं ॥ १२४४ ।। दइया तुज्झ दुगुच्छावसेण वेसाकुलम्मि संजाया ।। ता भो सुपत्तदाणं, अखंडचित्तेण वियरेह ।। १२४५ ।। सोऊण इमं दोन्नि वि, सहसा संपत्तजाइसरणाणि ॥ मुणिणो तस्स समीवे, गिहत्थ-धम्मं पवज्जंति ।। १२४६ ।। गंतुं नियम्मि भवणे सम्म पालंति गहियजिणधम्मं ।। कमसो सग्गं मोक्खं, लहंति सत्तट्ठजम्मेहिं ।। १२४७ ॥
Jain Education International 2010_04
For Private & Personal Use Only
www.jainelibrary.org
