________________
४५८
सिरिपउमप्पहसामिचरियं
करुणारंजिय चित्तो, तत्तो अवयरिय तं नरं वयइ ।। जइ भणसि तुमं तत्तो, इमाउ कड्डेमि अवडाओ ॥ ८९२ ।। सो आह अहं इहई, सुहेण चिट्ठामि [एत्थ कूवम्मि] ।। आसायंतो तत्तो एत्थत्थे किमवि मा भणसु ।। ८९३ ।। अह सो खेयरनाहो, जंपइ रे मूढ ! महुरसलवम्मि ।। वारसु निययं चित्तं, परिचिंतसु अप्पहियकज्ज ।। ८९४ ।। किं न नियसि कूवतले, गिलणमणं अजगरं महाभीमं ॥ विसविसमविसहरे तह, तरुणारुणतरणिसमनयणे ॥ ८९५ ।। किं न नियसि खज्जंतं, वडवायं वज्जदसणजुयलेण ।। पिच्छेसि मच्छियाओ किं न हि पडिरोमलग्गाओ ।। ८९६ ॥ निहणंतं वडरुक्खं, किं न निरिक्खेसि मत्तमातंगं ।। एमाइ तेण भणिओ मणम्मि काऊण तव्वयणं ।। ८९७ ।। पभणइ उद्धरसु ममं नीओ तेणावि नियडसेलम्मि ।। गयणेण सुरतेओ चारणसमणो तहिं पत्तो ।। ८९८ ।। सो जंपइ मुणि नाहो, हे सुपुरिस ! विसमरन्नकूवाओ ।। जह नीहरिओ सि तुम, तहेव नीहरसु भवकूवा ।। ८९९ ।। एयाउ कूवयाओ नीहरिऊणं अगाहभवकूवे ।। मा पडिहसि जं एसो, दुहावहो जम्मकोडीसु ॥ ९०० ॥ तथाहि :जह कुमरतुरंगेणं, वणकिरणा नासिऊण कूवम्मि ।। निविडंधयारभीमे, खित्तो कंपंतसव्वंगो ।। ९०१ ।। तह भवकूवे रुंदे, अन्नाणमहंधयारभीमम्मि ।। कम्म-परिणामकरिणा, पुणरुत्तं खिप्पए जीवो ॥ ९०२ ॥ जह तत्थ अंधकूवे, अजगरभुजगो भयंकरो एत्थ ।। तह भवकूवे मोहं, भयावहं मुणसु भुवणस्स ।। ९०३ ।। जह इह चउरो भुयगा, तह चउरो कोह-दंभ-मय-लोहा ॥
Jain Education International 2010_04
For Private & Personal Use Only
www.jainelibrary.org
