Page Text
________________
मणोरमा-कहा
चरजीवनिकायनिक्कारणबंधू, खमामद्दवाइदसविहसमणधम्ममहाभरधुरधणधोरेयकंधरा, कोहानलविज्झवणजलहिसमाणा, माणसेल-सिरदलणदंभोलिसण्णिहा, गुविलमायाकुडंगी-मूलुम्मूलणपच्चलकुहाडाणुगारिणो, लोहमहासमुद्दसोसणवडवानलो, रुवाइगुणगणाहरणहारिणो, अट्ठारस-सीलंगसहस्सधारिणो, संपुण्णदुवालसंगसुयसागरपारगा, आगमविहिविहियाणुट्ठाणकारगा, असमायारपयट्टसीसगणनिवारगा, अट्ठमयट्ठाणविप्पमुक्का, पंचसमिया, तिगुत्ता, सत्तरसविहसंजमासेवणसालिणो, सचराचरजीव-संरक्खणाठाणकारिणो, सजलजलहरगंभीरसरसमारद्धधम्मदेसणा, सवणसमाणदियभव्वजणमाणसा, जयसुंदराभिहाणा सूरिणो जयभसणुज्जाणे अहाफासुए पएसे अणुण्णवित्ता उग्गह समोसरिया। एयं सोऊण हरिसिओ विज्जाहराहिवो । दिण्णं उज्जाणपालयस्स नियअंगलग्गं वत्थाहरणाइयं सुवण्णलक्खो य । विसज्जिओ पियंवओ। अप्पणा वि विज्जसेण-रइसंदरी-विजयावली-मणोरमामणोरमसेण-पमुह-पहाण-परियणपरिवारिओ, चउरंग-बल-विहियपरिवेढो, गंधवारणमारुढो, मागहजणुग्घुट्ठजय-जयारावपूरियदियंतरो, भेरीझंकारभरियभुवणोदरो, वहंत्रहंतमद्दलगसद्दसवणसंजायघणथणियसंकप्पसंतुट्ठसिहिकुलविमुक्ककलकेयारवकरंबियाणवज्ज-आउज्जनिनायबहिरियजणसवणंतरो, संचलिओ तुरिओ सूरिवंदणानिमित्तं सूरसेणनराहिवो । पत्तो जयभूसणुज्जाणं । उत्तिण्णो करिवराओ । काऊण तिपयाहिणं वंदिया सरिणो । विणयविहियकरयलंजलिनिसण्णो सुद्धधरणीतले । पारद्धा सूरिणा धम्मदेसणा-- नारयतिरियनरामरगई सुसत्तेहिं दुक्खतत्तेहिं । कह कह वि पाउणिज्जइ मणुयभवो भूरि पुण्णेहिं ।१०१९। लद्धे वि तम्मि दुलहे सण्णाणावरणकम्मदोसेण । जायइ न सम्मबोहो भवविडवि-दवानलसमाणो ।१०२०। कुगुरुकुदेवकुधम्मेहि विणडिया कयकुकम्मपब्भारा । मणुयत्तणं पि हारिति पाणिणो मोहदोसेण ।१०२१। संसारम्मि अणंते परिब्भमंतेहिं सव्वसत्तेहिं । तं नत्थि एत्थ ठाणं अणंतसो जं न पत्तं ति ।१०२२। जिणधम्मपरिभट्ठा भमिया सव्वत्थ दुक्खिया जीवा । ता भो जिणपण्णत्ते धम्मम्मि समज्जम कुणह ।१०२३।
राइणा भणियं--"भयवं! केरिसं धम्माणुट्ठाणमक्खेवेणं विसुद्धफलसाहगं भवइ ?" सूरिणा भणियं--"अट्ठारसपावट्ठाणपरिहाररूबं विसुद्धचारित्तं ।” राइणा भणियं--"भयवं ! कि नामाणि कि सरूवाणि वा पावठाणाणि ? " सूरिणा भणियं--"सोम सुण--"१ पाणाइवाए २ मुसावाए ३ अदत्तादाणे ४ मेहुणे ५ परिग्गहे ६ कोहे ७ माणे ८ माया ९ लोभे १० पेज्जे ११ दोसे १२ कलहे १३ अब्भक्खाणे १४ अरईरई १५ पेसुण्णे १६ परपरिवाए १७ मायामोसे १८ मिच्छादसण[स]ल्ले अट्ठारसमे। तत्थ णं पढमे पावट्ठाणे पाणाइवाए । से णं हिमवुट्ठी अणुकंपापउमसंड-मंडलीए, जलिहिजलतलं महापावपंकस्स, अवयरण-निस्सेणी निरय-निक्खुडमारुहंताणं, कारणं अप्पाउत्ताए, निबंधणं हीणाहियंगोवंगनिरूवत्तणाणं, हेऊ दोहग्गाणारोग्गदुब्बल्लदुव्वणाईणं । किंचदाणं निस्संगतवं दिक्खा देवच्चणं रसच्चाओ। जीवदया-वररहिया सव्वे वि गुणा अगुणपक्खे ।१०२४। जावइयाई दुक्खाई हुँति चउगइगयस्स जीवस्स । सव्वाइं ताई हिंसा-फलाई निउणं वियाणाहि ।१०२५। जीववहो अप्पवहो जीवदया अप्पणो दया होइ । ता हेया जियहिंसा अप्पहियं इच्छमाणेण ।१०२६ । नच्चा मच्चु दुहत्थे नाणाविहजोणि परिगए जीवे । न हणेज्ज अत्तणा ते परेण नो वा हणाविज्जा ।१०२७। विद्धस्स कंटगेण वि जायइ जीवस्स वेयणा तिव्वा । किं पुण पहम्ममाणस्स तिक्खसत्थाइघाएहिं ।१०२८। दठ्ठमवट्टियं करकयसत्थं पुरिसं विलोलतरलच्छो । खरपवणपहयतरुवरपत्तं व पकंपए जीवो ।१०२९। मरसु इमम्मि भणिए जायइ जीवस्स दारुणं दुक्खं । जं पुण मारिज्जंतस्स होइ तं केवली मुणइ ।१०३०। पाणेहितो वि पियं न किंचि जीवाण विज्जइ जयम्मि । ता अप्पोवम्मेणं तेसु दया होइ कायव्वा ।१०३१।। दुट्ठमणवयणकायाऽऽउहेहिं जीवे उ जे विहिंसति । दसगुणियाऽऽइअणंतं तेहि चिय ते विहम्मति ।१०३२। १ देखो संवेगरंगशाला पृ. ४३२
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |